Bugun, 6-may kuni, Kogon tumani hokimi Otabek Qazoqov bilan kogonlik talaba yoshlar uchrashuvi tashkil etildi. Uchrashuvda O'zMilliy bank xodimi Obidjon Shodiyev, ish beruvchi tashkilot va korxonalar rahbarlari, universitet rahbariyati, professor-o'qituvchilari, pedagoglar hamda talaba-yoshlar ishtirok etishdi.
Uchrashuvni BuxDU Oʻquv ishlari boʻyicha prorektori R.Gʻ.Jumayev kirish so'zi bilan ochib berdi. U nutqi davomida Hokim va yoshlar uchrashuvi belgilangan grafik asosida har bir tuman doirasida tashkil etilishini hamda mazkur uchrashuvlar tumanning iqtisodiy-ijtimoiy rivojlantirish sari yo'l ekanligini ta'kidladi.
Shuningdek, Kogon tumani hokimi Otabek Qazoqov so'zga chiqib, bugungi kunda Kogon tumanida amalga oshirilayotgan islohotlar, tashkil etilayotgan sanoat korxonalari va loyihalar, ayniqsa, Yoshlar markazi, yoshlar sanoat zonasi, xorijiy hamkorlar haqida ma'lumot berdi. Talaba yoshlarga o'z sohasini chuqur o'rganish, maqsad qo'yish, til o'rganish borasida muhim maslahatlarini berdi.
Uchrashuv davomida Obidjon Shodiyev tomonidan haq to'lanadigan amaliyot hamda imtiyozli kredit berish tartibi haqida ma'lumot berildi. Shu bilan birga, talaba yoshlar o'zlarini qiziqtirgan savollarga javob, ishga joylashish, yo'l qatnovi, shaxsiy biznesni yo'lga qo'yish borasidagi muammolariga amaliy ko'mak olishdi.
