25-aprel kuni Buxoro davlat universitetida o‘tkazilgan Karyera kuni tadbirlari doirasida Xitoy tili va madaniyati markazining ochilish marosimi bo‘lib o‘tdi.
Markaz ochilishida universitet rahbariyati, hamkorlar Pekin Ipak yo‘li madaniyatni rivojlantirish kompaniyasi (Beijing Silk Road Culture Development Co., Ltd), Silk Road Innovatsiya va taraqqiyot instituti vakillari, BuxDUda ta’lim olayotgan xitoylik talaba va tadqiqotchilar ishtirok etishdi.
Ochilish marosimida so‘zga chiqqanlar markaz faoliyati bilan bog‘liq rejalar va kutilayotgan natijalar to‘g‘risida fikr bildirishdi. Aytish joizki, markaz nafaqat xitoy tilini o‘qitish, balki 200 dan oshiq Xitoy universitetlaridagi grant imkoniyatlari bilan tanishtirish, hamkorlikda ilmiy tadqiqotlar olib borish, xitoylik talabalarni jalb qilish, O‘zbekistonda faoliyat olib borayotgan Xitoy kompaniyalari uchun malakali mutaxassialr tayyorlash maqsadidagi axborot markazi sifatida ham faoliyat ko‘rsatishi kutilmoqda.
Hamkorlikning keying bosqichi esa BuxDU huzurida xitoy tilini bilimini baholovchi rasmiy HSK sertifikati test markazining ochilishi bo‘ladi. Test markazi faoliyatini qo’llab-quvvatlash uchun Xitoy hukumatining mablag‘lari jalb etiladi.
Har yili butun dunyo bo‘ylab 1 million nafardan ortiq talabgorlar HSK imtihonlarini topshirishadi. HSK sertifikatlari O‘zbekistonda magistratura hamda doktoranturaga hujjat topshirishda talab etiladigan xorijiy tillarni bilish darajasini baholovchi xalqaro tan olingan sertifikatlar ro‘yxatiga ham kiritilgan bo‘lib, uning yuqori darajalari Xitoyning nufuzli universitetlarida grant asosida ta’lim olish imkonini beradi.
Buxoro davlat universiteti huzurida tashkil qilinadigan test markazi nafaqat Buxoro, balki qo‘shni viloyatlardan talabgorlar uchun ham xizmat qiladi.
