9-aprel Amir Temur tavalludining 689 yilligi munosabati bilan Buxoro davlat universiteti Tarix va yuridik fakulteti jamoasi tomonidan IIV huzuridagi Buxoro akademik litseyi faollar zalida “Sohibqiron Amir Temur shon-shuhratimizning buyuk timsoli” mavzusida ma’naviy-ma’rifiy tadbir bo‘lib o‘tdi.
Tadbirni “Arxeologiya va Buxoro tarixi” kafedrasi mudiri t.f.n.dots. F.Temirov kirish so‘zi bilan ochdi. Amir Temurning o‘zbek davlatchilik tarixida yuksak o‘ringa ega ekanligi hamda temuriylar davrida asos solingan Ikkinchi Renessans, hozirgi Yangi O‘zbekiston asos solayotgan Uchinchi Renessans poydevori ekanligi ta’kidlandi. Arxeologiya va Buxoro tarixi kafedrasi professori Sh.H.Vohidov Amir Temurga bag‘ishlangan asarlarda shajara va avlodlar masalasi haqida qimmatli ma’lumotlar berdi.
Shuningdek, tadbir davomida Tarix va yuridik fakulteti talabalari tomonidan tayyorlangan chiqishlar tashrif buyurganlarda katta qiziqish uyg‘otdi. Shu bilan birga, litsey jamoasi pedagoglari va talabalari tomonidan mavzuga doir ma’lumotlar berildi.
