Oʻzbekiston Respublikasi Prezidenti Sh.Mirziyoyevning PQ-61-sonli qarori asosida amalga oshirilayotgan "Kelajakka qadam" dasturi yuzasidan Buxoro davlat universiteti katta faollar yigʻingohida 24-28-mart kunlarida bitiruvchi-yoshlar bilan uchrashuvlar tashkil etildi.
Mazkur uchrashuvlarda BuxDU rektori O.X.Xamidov, Oʻquv ishlari boʻyicha prorektor R.Gʻ. Jumayev, universitet rahbariyati, pedagog-xodimlar, BuxDU Marketing va karyera boʻlimi, AJ "Milliybank" Buxoro boʻlimi xodimlari hamda talaba-yoshlar ishtirok etishdi. Mazkur uchrashuvlar universitetning barcha fakultetlarida, jumladan, San’atshunoslik va pedagogika, Jismoniy madaniyat, Tarix va yuridik, Filologiya, Xorijiy tillar, Iqtisodiyot va turizm, Fizika-matematika va axborot texnologiyalari, Tabiiy fanlar va agrobiotexnologiyalar fakultetlarida belgilangan jadval asosida bo’lib o’tdi.
"Kelajakka qadam" dasturi oliy ta’lim muassasalari bitiruvchilarining bandligini ta’minlash va ularning oʻz kasbiy faoliyatini muvaffaqiyatli boshlashiga koʻmaklashishdan iborat, dastur Oliy ta’lim, fan va innovatsiyalar vazirligi hamda “Oʻzmilliybank” AJ hamkorligida amalga oshiriladi.
Har bir uchrashuvda ushbu dasturning mohiyati har bir yoshga yetkazilib, dastur doirasida qanday imtiyozlar taqdim etilishi, tadbirkorlikni boshlash istagida boʻlgan bitiruvchilar uchun imtiyozli kreditlar va moliyaviy yordam mexanizmlari, kasbiy malaka va haq toʻlanadigan amaliyot stajirovka dasturlariga ajratilgan grantlar, startap loyihalarni rivojlantirish va gʻoyadan loyihagacha boʻlgan jarayonda davlat va xususiy sektor bilan hamkorlik imkoniyatlari batafsil tushuntirildi.
Muloqot soʻngida universitet rektori va mas’ullar tomonidan dastur yuzasidan talabalarni qiziqtirgan savollarga javob berildi.
