Buxoro davlat universiteti huzuridagi Universal sport majmuasida Buxoro viloyati oliy ta’lim muassasalari rahbar xodimlari o‘rtasida mini-futbol, stol tennisi va shaxmat, basketbol, voleybol bo‘yicha “Vazir kubogi” sport musobaqalari bo‘lib o‘tdi.
Tadbir oliy ta’lim muassasalari o‘rtasida sog‘lom turmush tarzini ommalashtirish, sportni targ‘ib qilish va yoshlarni sportga jalb etish maqsadida tashkil etildi.
Dastlab Buxoro viloyati sport boshqarmasi hamda Buxoro viloyati oliy ta’lim muassasalari o‘rtasida talaba-yoshlarini sportga keng jalb etish, ular o‘rtasida ommaviy sportni rivojlantirish, zarur sharoitlar yaratish, sog‘lom turmush tarzini keng targ‘ib qilish maqsadida qo‘shma qaror hamda hamkorlik memorandumlari imzolandi.
Universitetda “Universiada-2025” sport musobaqalarida sovrindor bo‘lgan basketbol jamoasi hamda sportning voleybol turi bo‘yicha “Buxoro viloyati hokimi kubogi” musobaqasi g‘olibligini qo‘lga kiritgan BuxDU voleybol yigit va qizlar jamoalari viloyat mutasaddi rahbarlar tomonidan taqdirlandi. Ularga medallar va tashakkurnomalar topshirildi.
Ushbu tadbir universitet rahbarlari va ishtirokchi tashkilot vakillari tomonidan qo‘llab-quvvatlandi. Bu esa kelgusida sport sohasidagi hamkorlik va qo‘shma loyihalarni yanada rivojlantirishga turtki bo‘ladi.
