Bu yilgi ko‘klam nafasini har bir yurtdoshimiz intiqlik bilan kutgani tabiiy. Ko'klamning tumori, go'zallik va nafosat ayyomi ham tashrif buyurdi.
BuxDUda bayram shukuhi o'zgacha. O‘zaro hamjihatlik, shukronalik ayyomi munosib tarzda boshlandi.
Sayl tantanavor tarzda San’atshunoslik va pedagogika fakulteti tо‘garak ishtirokchilari tomonidan qadriyatlarimiz gultoji Navro'z ayyomini madh etuvchi kuylar ijrosi bilan boshlandi.
Universitetimiz jamoasi yurtimiz qadriyatlarini tarannum etishdan iftixordalar. Jumladan, urf-odat va an'analarimizni aks etgan dekoratsiyalar, milliy liboslarimiz, hunarmandchiligimizni namoyon etadigan hamda talaba yoshlarimiz ijodi namunalari — bahoriy kayfiyat bag'ishlaydigan suratlar ko'rgazmasi, folklor dastalari tayyorlab kelgan azaliy marosimlarimiz namoyishi, milliy raqs va kuy qo'shiqlar dilingizni yayratadi.
Navro'z sayli mobaynida har bir fakultet O'zbekistonimizning turli go'shalaridagi folklor an'analar, taomlari, liboslari va marosimlarni namoyish etishdi.
Xususan, "Kelin salom" marosimi, "Suz xotin" marosim qo'shig'i ijrosi, surxoncha, samarqandcha, buxorcha raqslar, o'lan, lapar, aytishuvlar ijrosi betakror merosimizni yana bir karra jonlantirdi, desak aslo mubolag'a bo'lmas.
Shuningdek, saylda arqon tortish, tosh ko'tarish, kurash kabi milliy o'yinlarimiz hamda tennis, shaxmat, shashka kabi sport musobaqalari tashkil etildi.
Talabalar tomonidan Navro'z bayramiga bag'ishlangan "Tilaklar taxtasi" tashkil etildi.
