Bugun oʼzbek xalqining taniqli shoirasi Zulfiya Isroilovaning tavalludi munosabati bilan Buxoro davlat universitetida adabiy, musiqiy, badiiy kecha tashkil etildi.
Universitet bosh foyesida BuxDU fakultetlari talabalari tomonidan Zulfiyaxonim hayoti va ijodini tarannum etuvchi koʼrgazma tashkil qilindi. Shuningdek, Sanʼatshunoslik fakulteti talabalari tomonidan Zulfiyaxonim surati chizilmoqda hamda milliy cholgʼu asboblari bilan milliy kuylarimiz ijro etildi.
Buxoro davlat universiteti katta yigʼingohida Zulfiyaxonim tavalludining 110 yilligi munosabati bilan universitet filologiya fakulteti tomonidan tashkil etilgan "Zulfiya-vafo va sadoqat kuychisi" nomli ma'naviy-ma'rifiy tadbir boʼlib oʼtmoqda. Tadbirni BuxDU Yoshlar masalalari va ma’naviy-ma’rifiy ishlar bo‘yicha birinchi prorektor Dilshod Yavmutov kirish soʼzi bilan ochib berdi.
Shuningdek, tadbirda Buxoro viloyati hokimining oʼrinbosari-oila va xotin-qizlar boshqarmasi boshligʻi Hafiza Artikova, Respublika Ma’naviyat va ma’rifat markazi Buxoro viloyati bo‘limi rahbari, falsafa fanlari doktori Marhabo Pardayeva, BuxDU professori Dilrabo Quvvatova hamda universitet bitiruvchisi "Zulfiya" nomidagi davlat mukofoti sovrindori Nozima Xoliqovalar soʼzga chiqib, shoiraning ijodi, barchaga oʼrnak boʼladigan saboti hamda bugungi kunda xotin-qizlarga berilayotgan imkoniyatlar haqida gapirib oʼtdilar.
