Ayni paytda xorij safarida bo‘lib turgan xalqaro hamkorlik bo‘yicha prorektor Abror Jo‘rayev 13-fevral kuni Ummonning bosh oliy ta’lim muassasasi hisoblanuvchi Sulton Qobus universitetida uchrashuvlar o‘tkazdi. Shu kuni Sulton Qobus universiteti xalqaro hamkorlik bo‘yicha prorektori Dr. Mona Bint Fahad Al Said va xalqaro hamkorlik departamenti rahbari Mahmood Abdullah Al Kindi bilan o‘tkazilgan uchrashuvda O‘zbekiston Respublikasining Ummondagi elchixonasi konsuli Jo‘rabek Latifjonov ham ishtirok etdi.
Uchrashuvda hamkorlikning bir qator ustuvor yo‘nalishlari bo‘yicha dastlabki kelishuvlarga erishildi.
Shu jumladan:
- O‘zbekiston Respublikasi Prezidentining 15.03.2024 yildagi “2025-yilda YUNESKO Bosh konferensiyasi 43-sessiyasining Samarqand shahrida o‘tkazilishiga tayyorgarlik ko‘rish bo‘yicha chora-tadbirlar to‘g‘risida” PQ-128-son qarori doirasida universitetimiz tomonidan Ummonda tashkil etiladigan targ‘ibot tadbiri, xususan O‘zbekiston madaniyati va turizmi kunini Sulton Qobus universitetida o‘tkazishga kelishildi;
- Sulton Qobus universiteti rahbariyati o‘zbekistonlik sportchilarning natijalarini yuqori baholab, universitet jamoalarining Buxoro davlat universitetida mashg‘ulotlar o‘tkazishi taklifini kiritdi;
- Qishloq xo‘jaligi, qayta tiklanuvchi energiya manbalari, cho‘llashish va sho‘rlanishga qarshi kurash, aniq fanlar yo‘nalishlarida ilmiy hamkorlik qilish, Scopus va WoS bazalariga kiritilgan ilmiy jurnallarda hamkorlikda maqolalar chop etishga qiziqish bildirildi. Ushbu maqsadda har ikkala tomon o‘z olimlari uchun ustuvor bo‘lgan ilmiy yo‘nalishlar bo‘yicha ma’lumot almashishga kelishib olishdi;
- Sulton Qobus universitetida O‘zbekiston burchagini tashkil qilish taklifi qo‘llab-quvvatlandi.
Ushrashuv oxirida prorektor A.Jo‘rayev Sulton Qobus universiteti rahbariyatini Buxoro davlat universitetining 95-yilligi munosabati bilan o‘tkaziladigan tadbirlarda ishtirok etishga taklif qildi.
Universitet rahbariyati ushbu uchrashuvni tashkil qilishda yaqindan yordam bergan O‘zbekistonning Ummondagi elchixonasi vakilalriga, xususan elchi Abdusalom Qurbonov, konsul Jo‘rabek Latifjonov, ish yurituvchi Odiljon To‘laganovlarga minnatdorchilik bildiradi.
Ma’lumot uchun: Sulton Qobus universiteti QS-2025 reytingida 362-o‘rinda, Times-2025 reytingida 601-800 guruhida o‘rin egallagan. Shuningdek, universitet Neft muhandisligi sohasida 36-o‘rinda, Kutubxona boshqaruvida 51-100 guruhida, Pedagogika sohasida 201-250 o‘rinda, ko‘plab boshqa yo‘nalishlarda yuqori 500 talikdan o‘rin egallagan.
