BMT Bosh Assambleyasining 2015-yil 22-dekabrda qabul qilingan rezolyutsiyasiga muvofiq 11-fevral - “Ilm-fan sohasidagi ayollar va qizlar xalqaro kuni” deb e’lon qilingan. Shu munosabat bilan Oʻzbekiston Respublikasi Oila va xotin-qizlar qoʻmitasi tomonidan “Ilmli ayol – jamiyat koʻzgusi” mavzusida haftalik oʻtkazish belgilangan.
Ushbu haftalik doirasida Buxoro davlat universitetida “Ayol va jamiyat: muammo va yechim” mavzusidagi forum oʻtkazildi. Forum boshlanishidan oldin Oʻzbekiston Respublikasi Oliy Majlis Senat raisi Tanzila Narbaeva viloyat oliy ta’lim muassasalari olima ayollarining ilmiy va innovatsion ishlanmalari koʻrgazmasida ishtirok etib loyihalar bilan yaqindan tanishdi.
Koʻrgazma davomida Oʻzbekiston Respublikasi Oliy Majlis Senati raisi Tanzila Narbaeva hamda Buxoro viloyati hokimi Botir Zaripov ushbu koʻrgazma bilan tanishib oʻz fikr-mulohazalarini bildirishdi.
Xususan, loyihalarni patentlash masalasiga alohida e’tibor qaratildi. Nafisa Joʻrayevaning “Omega6 va Omega3 yogʻ kislotalari nisbati muvozanatlashtirilgan oziq-ovqat yogʻ-unli mahsulot va uni olish usuli” mavzusidagi loyihasi bilan tanishib ushbu ixtironing naqadar muhimligi, aholi salomatligini saqlashdagi ahamiyati Senat raisi tomonidan e’tirof etildi.
Botir Zaripov esa ushbu loyiha natijalarini viloyat miqyosda keng yoʻlga qoʻyish uchun mas’ullarga tegishli topshiriqlar berdi.
Oʻzbekiston Respublikasi Oliy Majlis Senati raisi Tanzila Narbaeva BuxDUda tashkil etilgan Ofis Registrator markazi faoliyatini yaqindan oʻrgandi.
Ofis Registrator oʻquv jarayonini raqamlashtirish va talabalarga xizmat koʻrsatish sifatini oshirish maqsadida joriy etilgan boʻlib, talabalarni roʻyxatga olish va qayd etish, elektron hujjat almashinuvini tashkil etish, talabalar akademik harakatlarini boshqarish, oʻqishni koʻchirish va tiklash boʻyicha xizmatlar koʻrsatish, diplom va sertifikatlarni rasmiylashtirish kabi vazifalarni samarali bajarmoqda.
Mazkur forumda Oʻzbekiston Respublikasi Oliy Majlis Senati raisi Tanzila Narbaeva, Buxoro viloyati hokimi Botir Zaripov, Viloyat hokimi oʻrinbosari Hafiza Artikova, Buxoro davlat universiteti professori, Oliy Majlis Inson huquqlari boʻyicha vakili (ombudsman)ning Buxoro viloyati mintaqaviy vakili Huseynova Abera Amanovna, Respublika Ma’naviyat va ma’rifat markazi Buxoro viloyati boʻlimi rahbari, falsafa fanlari doktori Pardayeva Marhabo Davlatovna, Viloyat OTMlari professor-oʻqituvchilari, talabalar, loyihalar va ishlanmalar mualliflari, Zulfiyaxonim izdoshlari ishtirok etishdi.
Forum avvalida Buxoro viloyati hokimi Botir Zaripov soʻzga chiqib, bugungi kunda xotin-qizlarga yaratilayotgan keng imkoniyatlar haqida toʻxtaldi. Senat raisi Tanzila Narbaeva esa ilm-fan sohasida buxorolik ayollarning salohiyati yuksak ekanligini ta’kidladi.
Shuningdek, forum doirasida Oliy Majlis Inson huquqlari boʻyicha vakili (ombudsman)ning Buxoro viloyati mintaqaviy vakili Abera Huseynovaning “Buxoro olimalarining viloyat ijtimoiy-iqtisodi, ijtimoiy-ma’naviy rivojlanishdagi oʻrni” mavzusidagi ma’ruzasi tinglandi.
“Yangi Oʻzbekistonning texnik-texnologik rivojlanishida olima ayollarning oʻrni va roli” mavzusida Buxoro muhandislik-texnologiya instituti rektori, dotsent Sadoqat Siddiqova soʻzga chiqdi. Buxoro davlat universiteti professori, filologiya fanlari doktori, “Doʻstlik” ordeni sohibasi Darmonoy Oʻrayeva “Oʻzbek folklorida ayol ma’naviyati ifodasi” mavzusida ma’ruza qildi.
Respublika Ma’naviyat va ma’rifat markazi Buxoro viloyati boʻlimi rahbari, falsafa fanlari doktori Marhabo Pardayevaning “Ma’rifatli ayol – jamiyat koʻzgusi” mavzusidagi ma’ruzasi tinglandi. Shuningdek, BuxDPI dotsenti, filologiya fanlari doktori, Oʻzbekiston Yozuvchilar uyushmasi a’zosi, “Ayol ma’rifati” jamoatchilik kengashi viloyat rahbari Laylo Sharipova “Farzand taqdirida soʻzning oʻrni” toʻgʻrisida soʻzladi.
