MUHIM XABAR
22.11.2024
Hurmatli talabalar
So’nggi paytlarda xorijda Work and Travel, Ferienjob ya’ni ish va sayohat shaklida xorijda malakaviy amaliyot o‘tash bilan bog‘liq murojaatlar soni oshib bormoqda.
Talabalarning ushbu shakldagi dasturlar asosida xorijda kasbiy malakani oshirishlari albatta ijobiy holatdir. Shuning bilan birga, jarayonlarda ba’zi tartibsizlik holatlari kuzatilmoqda.
Shu jumladan,
- Talabalar universitet bilan kelishuvi mavjud bo‘lmagan firmalarga murojaat qilishmoqda. Ushbu firmalar tijoriy asosda faoliyat ko‘rsatib, talabaning ish bilan ta’minlanishi, universitetdagi aniq ta’til davriga mos davrda xorijda bo‘lishi, o‘z vaqtida qaytib kelishini kafolatlash kabi mas’uliyatlarni o‘z zimmalariga olishmaydi. Natijada talabalarning ta’til davrida fakultetlarni xabardor qilmasligi, xorijdan kech qaytishi, o‘quv rejasidagi dars va amaliyot soatlarini bajarmasligi holatlari kelib chiqadi.
- Talabalar va/yoki firmalar tomonidan ba’zi hujjatlar (ma’lumotnomalar, xatlar va hokazo) universitetning rasmiy blankasiga umuman mos bo‘lmagan shakllarda tayyorlanib, imzoga taqdim etilmoqda. Yoki universitet logotipi tushirilgan, lekin shakli universitet rahbariyati bilan kelishilmagan xatlar tayyorlanmoqda. Shu o‘rinda O‘zbekiston Respublikasi Jinoyat kodeksining 228-moddasida hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish uchun jinoiy javobgarlik belgilanganligi eslatib o‘tiladi.
- Talabalar fakultetlar rahbariyati tomonidan tasdiqlanmagan hujjatlarni xalqaro hamkorlik departamentiga olib kelishmoqda. Bu avvalambor, talabaning ta’til davri ko‘rsatilgan hujjatlar bo‘lib, talabalar fakultet rahbariyatidan ruxsat olmagan holda, firma ko‘rsatgan muddatlarni belgilagan holda hujjat tayyorlashmoqda.
Yuqoridagi holatlardan kelib chiqqan holda, “Work and Travel” (Ish va sayohat) shaklida xorijda amaliyot o‘tmoqchi bo’lgan kunduzgi va sirtqi bo’lim talabalariga quyidagilar tavsiya etiladi:
- Buxoro davlat universiteti bilan kelishuvi bo‘lgan firmalar xizmatidan foydalanish. Bugungi kunda universitetning faqat NoVo Agency kompaniyasi bilan dastlabki kelishuvlari mavjud. Ushbu kompaniya o‘z navbatida Migratsiya agentligi bilan hamkorlikda rasmiy faoliyat yuritadi.
- Talaba va uning ta’til davri haqida ma’lumotlar kiritiladigan shaklni birinchi navbatda dekanat vakili tomonidan tasdiqlatish.
- Universitet rasmiy xatlarida foydalaniladigan shakllarni soxtalashtirmaslik. Aynan qaysi shakldan foydalanish zarurligi bo‘yicha universitet kelishgan firmalarga xabar beriladi.
- Xorijdagi kasbiy amaliyot o‘zi ta’lim oladigan yo‘nalishiga mos kelishini ta’minlash. Aksi holatda, o‘quv rejasida amaliyot belgilangan talabalar o’sha muddatda xorijda amaliyot o‘tsalar ham, ushbu amaliyot tan olinmaydi hamda amaliyot O‘zbekistonda qayta o‘tilishi lozim bo‘ladi.
- Xorijdagi ish beruvchi bilan o‘zi to‘gridan-tog‘ri aloqaga chiqib, kasbiy amaliyot o‘tash uchun taklif olganligini bildirayotgan talabalar, buning uchun aniq asosni taqdim etishlari (shartnoma, e-mail yozishmalari va hokazo) lozim.
- Barcha jarayonlarni amalga oshirish davrida universitet ichki tartib-qoidalarini buzmaslik, aksi holda kelib chiqishi mumkin bo‘lgan tegishli choralar uchun mas’uliyatni o‘z bo‘yniga olishga tayyorlik to‘g‘risida tilxatni imzolash.
Ayni paytda ushbu jarayonlar bo‘yicha dekanatlar va talabalar uchun yo‘riqnoma ishlab chiqilmoqda bo‘lib, fakultetlar dekanatlariga yetkazilishi hamda universitet rasmiy kanallarida e’lon qilinishi rejalashtirilgan.
Yuqorida keltirilgan talablardan chetlashish, ya’ni universitet ichki-tartib qoidalarini qo‘pol ravishda buzish holatlari (fakultetga xabar bermaslik, hujjatlarni soxtalashtirish, tilxat rasmiylashtirmaslik, vaqtida qaytib kelmaslik va hokazo) kuzatilganda, xalqaro hamkorlik departamenti tomonidan tegishli mamlakatlar elchixonalariga murojaat qilib, viza rasmiylashtirish jarayonlarini to‘xtatish, talabalarga nisbatan keskin intizomiy choralar ko‘rilishi to‘g‘risida ogohlantiramiz.
