Vladimir Lvovich Kvint – mashhur iqtisodchi, strategik rejalashtirish mutaxassisi, akademik va AQSh Milliy Fanlar akademiyasi a’zosi hisoblanadi. U dunyoning yetakchi universitetlari va ilmiy tadqiqot muassasalarida ishlagan, shu jumladan, Harvard Universitetida, Moskva Davlat Xalqaro Munosabatlar Institutida (MGIMO), Moskva Davlat Universitetida (MGU) va boshqa ko‘plab nufuzli oliy o‘quv yurtlarida o‘z faoliyatini olib borgan. Kvintning ilmiy izlanishlari asosan global iqtisodiyot, strategik rejalashtirish, xalqaro menejment va iqtisodiy rivojlanish masalalariga bag‘ishlangan. Uning "Strategik rejalashtirish", "Raqobat ustunligi" va boshqa ko‘plab kitoblari ilmiy hamjamiyat va tadbirkorlar orasida keng o‘rganilgan va qadrlangan.
2024-yilning 31-oktyabr kuni Buxoro davlat universitetiga ushbu olimning tashrifi amalga oshirildi. Mehmonni Buxoro davlat universiteti rektori Obidjon Xamidov kutib olib, universitetda talabalar ta`lim olishi uchun yaratilgan shart-sharoitlar, BuxDU "Ofis registrator" markazi, faollar yig`ingohi to'g'risida batafsil ma`lumot berib o`tdi.
Kvintning Buxoro davlat universiteti Iqtisodiyot va turizm fakulteti professor-o‘qituvchilari bilan uchrashuvi muhim voqealardan biridir. Ushbu uchrashuv davomida u iqtisodiy rivojlanish va strategik rejalashtirish bo‘yicha o‘z bilim va tajribalarini o‘rtoqlashdi. Shuningdek, u strategik rivojlanish yo‘nalishlarida amalga oshirilishi zarur bo‘lgan qadamlarga e’tibor qaratdi.
Professor Kvint o‘z nutqida Buxoro viloyati va O‘zbekistonning iqtisodiy rivojlanish imkoniyatlari haqida gapirib, strategik rejalashtirishda zamonaviy uslublar va raqobatbardoshlikni oshirish bo‘yicha tavsiyalar berdi. Shu bilan birga, u iqtisodiyot sohasidagi jahon tajribasidan kelib chiqib, iqtisodiy islohotlarning milliy iqtisodiyotga ijobiy ta’sirini ham ko‘rsatib o‘tdi.
Mazkur uchrashuv o‘z navbatida talabalarga, professor-o‘qituvchilarga xalqaro tajribani o‘rganish va uni amaliyotga tatbiq etish borasida yangi ko‘nikmalar hosil qilish imkonini yaratdi. Kvint bilan bo‘lib o‘tgan ushbu ilmiy muloqot Buxoro davlat universitetining ilmiy tadqiqot va amaliy rivojlanishiga katta hissa qo‘shishi kutilmoqda.
