So‘ngi yillarda mamlakatimizda aholi o‘rtasida jismoniy tarbiya va sportni ommalashtirish, talaba yoshlarni sog‘lom turmush tarziga bo‘lgan qiziqishi kundan kunga oshib bormoqda. Buning yorqin misollarini yurtimizda barpo etilayotgan ko‘plab sport majmualari, mahallarda, ta’lim muassasalarida foydalanishga topshirilayotgan sport turlari bo‘yicha zamonaviy obyektlar hamda ularda minglab fuqarolarimiz va ayniqsa, yoshlarimizning faol sport bilan shug‘ullanayotganida ko‘rish mumkin.
Shu munosabat bilan 2024-yilning 24-oktabr kuni Buxoro davlat universiteti huzuridagi Universal sport majmuasida "Oʻzbekiston - yoshlar mamlakati" sport festivali boʻlib oʻtdi.
Majmua kirish joyida BuxDU sportchi talabalari, professor-o'qituvchilarining yutuqlari aks etgan ko'rgazma tashkil etildi. Shuningdek, San'atshunoslik fakultetining talaba yoshlari tomonidan mumtoz kuylar ijro etildi.
Buxoro shahridagi Universal sport majmuasida viloyat, shahar hokimligi va huquq tartibot organlari vakillari, viloyat yoshlar ishlari boshqarmasi vakillari, oliy ta`lim muasssasalari rahbarlari, viloyat sport boshqarmasi tarkibiga kiruvchi federatsiyalar, sport maktablari va keng jamoatchilik vakillari, universitet professor-o'qituvchilari, talabalari ishtirok etishdi.
Buxoro davlat universiteti huzuridagi Universal sport majmuasi 2024-yil 17-avgustda ochilgan bo'lib, bu yerda 2 ta yirik jahon chempionatlari o'tkazildi. Arenada asosan futzal oʻyinlari, shuningdek, 10 ga yaqin sport turidan (jumladan, shashka, shaxmat, voleybol, mini futbol, basketbol, tennis, stol tennisi, yengil atletika, boks, kurash) musobaqalar oʻtkaziladi.
Darhaqiqat, majmuada sport bilan muntazam shugʻullanish va xalqaro darajadagi musobaqalarni yuksak saviyada oʻtkazish uchun barcha qulaylik yaratilgan. Inshoot tarkibidan 4 ming tomoshabinga moʻljallangan manej, oʻquv-mashgʻulotlar zali, VIP xona, oʻyin zali, yuvinish, kiyinish, sport jihozlarini saqlash xonalari oʻrin olgan. Tashqari qismida esa yugurish yoʻlaklari, sunʼiy qoplamali futbol maydoni, avtoturargoh bor.
Festivalni Buxoro davlat universiteti rektori O.X.Xamidov kirish soʻzi bilan boshlab berdi. U nutqi davomida ushbu majmua ochilganiga oz muddat boʻlgan boʻlsa ham, shu paytgacha 2 ta jahon chempionatiga mezbonlik qilganligini, shuningdek, bunday majmua nafaqat viloyatda, balki mamlakatimizda ham sanoqli ekanligini aytdi.
Shu bilan birga, Oliy taʼlim, fan va innovatsiyalar vazirligining Buxoro viloyati boshqarmasi boshlig`i Azamat Naimov, Buxoro davlat tibbiyot instituti rektori Shuhrat Teshayev, Buxoro davlat pedagogika instituti rektori Bahodir Ma'murov, Buxoro tabiiy resurslarni boshqarish instituti direktori Shavkat Imomovlar soʻzga chiqishdi. Ular shunday mukammal inshoot ochilganligi bilan Buxoro yoshlarini qutlashdi.
Shuningdek, festival davomida Buxoro davlat universiteti Jismoniy tarbiya va sport fakultetida tahsil olayotgan, sport musobaqalarida gʻolib va sovrindor boʻlgan sportchi talabalar taqdirlandi.
Turon yakka kurashi turi boʻyicha (U-11) kichik oʻsmirlar hamda kattalar oʻrtasida Oʻzbekiston chempionatida sovrinli o’rinlarni egallagan Usmonbekova Mehrangiz, Baxshilloyev Husniddin, Ergashboyev Daler taqdirlandilar. Shuningdek, tadbir davomida Shiri Lanka davlatining Kolombo shahrida 20 yoshgacha boʻlgan voleybol erkaklar o’rtasida Markaziy Osiyo chempionatida g`olib bo`lgan jamoamiz a’zolari Mustafoyev Gʻolibjon, Xoʻjamov Asatbek hamda Kiprda sambo boʻyicha kadetlar, oʻsmirlar va yoshlar oʻrtasida jahon chempionatida sovrindor bo`lgan Atayev Ozodbek Ulugʻbek o’g’li ham taqdirlandilar.
Festivalda oʻzbek jang san'ati federatsiyasi koʻrgazmali chiqishlari, musiqiy-badiiy chiqishlar yigʻilganlarga koʻtarinki kayfiyat baxsh etdi.
Universitetda barcha sport turlari bilan jamoamiz ayniqsa, yoshlarni muntazam shug‘ullanishi sharoitlar mavjud. Bugungi kunda nafaqat universitet jamoasi balki, universitet yon-atrofida joylashgan mahalla yoshlari ham kelib katta va kichik futbol, voleybol, basketbol, yengil atletika, boks, kurash kabi sport turlari bilan shug‘ullanish tizimi yo‘lga qo‘yilgan. Universitet jamoasi haftaning deyarli har kunida sportning u yoki bu turi bo‘yicha musobaqalar, salomatlik uchun o‘rtoqlik o‘yinlari bilan shug‘ullanishadi.
Universitetning yuzlab yoshlari Jahon va Osiyo chempionatlarida qo‘lga kiritayotgan yutuqlari qatorida magistrant Abdumalik Xalakov boks sport turi bo‘yicha Parij olimpiadasi-2024 oltin medal sovrindori va dotsent Sherzod Namozovni dzyudo sport turi bo‘yicha Parij paraolimpiadasi-2024 musobaqalarida oltin medalni qo‘lga kiritib, ikki karra olimpiada chempionligiga sazovor bo‘lgani bizga katta g‘urur bag‘ishladi. Umuman olganda, oliygohimizda barcha sport turlari bo‘yicha faoliyatlar va shuningdek, jamoaning sog‘lom turmush tarzini o‘z istagi bilan yaxshilashga bo‘lgan intilishi, xohishi ommaviy harakatga aylandi.
