Mamlakatimizdagi shu kunlarda qadrdon oliygohlar, mehribon ustozlar bilan xayrlashuv tadbirlari bo‘lib o‘tmoqda.
Oliy ta’lim bitiruvchisi bo‘lish nafaqat bitiruvchilar, balki ota-onalar, ustozlar uchun ham g‘oyat quvonchli va hayajonli voqeadir. Chunki, ilmning mashaqqatli pillapoyasining ikkinchi pag‘onasini zabt etgan azm-u shijoatli yoshlar timsolida sa’y-harakatlarning yana bir amaliy natijasini, xalqimiz va Vatanimizning kelajagini ko‘ramiz. Universitetda ko‘p yillik ta’lim-tarbiya jarayonidagi faoliyat tufayli ustozlar tomonidan berilgan baho orqali yoshlar bakalavrlik va magistrlik darajasiga erishdi.
Buxoro davlat universitetini 2023/2024-o‘quv yilida 55 ta ta’lim yo‘nalishi kunduzgi shaklda jami 4 401 nafar talaba bakalavr, 26 ta mutaxassislik bo‘yicha 163 nafar magistr o‘qishni tamomladi. Joriy o‘quv yilida 100 nafar talaba a’lo baholarga o‘qib imtiyozli diplomlarga ega bo‘ldi.
Har yilgi an’anaga muvofiq kecha ham BuxDU bakalavr va magistrlarni mustaqil ilm yo‘liga kuzatish uchun tantanali tadbir tashkil etildi. Ushbu tadbirni kirish so‘zi bilan Buxoro davlat universiteti rektori, iqtisodiyot fanlari doktori, professor Obidjon Xamidov ochib berdi. Shuningdek, tadbir davomida universitetimizning bitiruvchilari, sobiq O‘zbekiston Respublikasi Tashqi ishlar vaziri, Shanxay hamkorlik tashkiloti sobiq bosh kotibi, Buxoro davlat universiteti Kuzatuv Kengashi a’zosi Vladimir Norov, “O‘zbekiston Qahramoni” unvoni sohibi Muhammadjon Ahmedovlar bitiruvchi talabalarga o’z tilaklarini yo’llashdi. Shuningdek, bitiruv kechasida Oliy ta’lim, fan va innovatsiyalar vazirligi Buxoro viloyati hududiy boshqarma boshlig‘i Azamat Naimov, Buxoro viloyati prokuraturasi ijtimoiy sohada qonunchilik ijrosi ustidan nazorat bo‘limi boshlig‘i Xalikov Aziz, Buxoro davlat tibbiyot instituti rektori Shuhrat Teshayev, Respublika ma'naviyat va ma'rifat markazi Buxoro viloyati bo'limi boshlig'i Marhabo Pardayeva, Turizm va sport bosh boshqarmasi boshlig'i o'rinbosari Suhrob Bobokalonov, viloyat tashkilotlari rahbarlari ishtirok etishdi.
Tadbir davomida Buxoro shahar madaniyat bo’limi va San’atshunoslik fakulteti jamoalari hamkorligida konsert dasturi tashkil etildi. Shuningdek, konsert dasturi davomida To‘xtasin Rajabov tomonidan “Yangi O‘zbekiston” hamda “Anjir”, Qazoqov Azamat tomonidan “Xorazm lazgi” hamda Ustozlar termasi qo‘shiqlari, Mexriniso Samiyeva tomonidan “Tanovor” hamda “Nargiz” qo‘shiqlari, Sultonova Gulnora tomonidan “Mavrigi” hamda “Ozarbayjon popuri” qo‘shiqlari, Ruslan Rahmonov tomonidan qo’shiqlar, Saidov Jasur tomonidan “Maftun bo‘ldim” qo‘shiqlari ijro etildi.
Ma'lumot o'rnida shuni aytish joizki, muhtaram Prezidentimizning bevosita g‘amxo‘rliklari va yoshlar uchun yaratib bergan keng imkoniyatlari tufayli Buxoro davlat universiteti talaba-yoshlarning xalqaro, respublika, viloyat miqyosda erishgan yutug‘i ham salmoqli. Xususan, talaba-yoshlarni iqtidori, ilmiy sohadagi qiziqish va intilishlarini keltirsak, universitetning 1 nafar talabasi Prezident stipendiyasi, 10 nafar talaba Navoiy nomidagi, 1 nafar talaba Bobur nomidagi, 1 nafar talaba Islom Karimov nomidagi, 2 nafar talaba Mirzo Ulug‘bek nomidagi, 1 nafar talaba Beruniy nomidagi davlat stipendiya sovrindorlari shuningdek, 10 nafar talaba rektor, 4 nafar talaba “Turon bank”, 1 nafar talaba “Sarimsoqov” nomidagi, 1 nafar talaba Paxlovon Mahmud nomidagi stipendiyalarni qo‘lga kiritishdi. Shu bilan birga, 2 nafar talaba Zulfiya nomidagi davlat mukofoti sovrindori bo‘lishdi. Yana 1 nafar talaba Ulug‘bek vorislari tanlovi Respublika bosqichi g‘olibi bo‘lishgan bo‘lsa, 400dan ortiq talaba-yoshlar xalqaro, respublika va viloyat miqyosidagi intellektual, ilmi-fan, musiqa, san’at, sport, turizm, IT soha va yo‘nalishlarida o‘tkazilgan olimpiadalar, tanlovlar, musobaqalarda ishtirok etib nufuzli o‘rinlarni qo‘lga kiritdi.
Buxoro davlat universiteti Matbuot xizmati
