Buxoro davlat universitetida Bolgariyaning bosh oliy taʼlim muassasi bo‘lgan Sofiya universiteti bilan manfaatli hamkorlik aloqalari o‘rnatilgan bo‘lib, ushbu universitet QS-2024 umumiy reytingida 741-750 guruhida, sanʼat va gumanitar sohada 288-o‘rinda, falsafa va dinshunoslik sohasida 51-100 guruhida qayd etilgan.
Sofiya universiteti bilan “Xorijiy til va adabiyot (ingliz tili), media” qo‘shma magistratura dasturini ayni paytgacha 8 nafar talaba tugallab, Yevropa namunasidagi diplomni qo‘lga kiritdi. Ayni paytda 19 nafar talaba qo‘shma magistratura dasturida taʼlim olmoqda. Ushbu dastur Bolgariya OTMlarining O‘zbekistondagi hozircha yagona qo‘shma taʼlim dasturi bo‘lib hisoblanadi.
Ayni paytda ushbu hamkorlikni yanada kengaytirish, ilmiy aloqalarni kuchaytirish, o‘quv dasturlarini transformasiya qilish, universitet boshqaruvini strategik rejalashtirish, professional ta’lim bilan integratsiya tajribasini o‘rganish, biotexnologiya sohasida qo‘shma ta’lim dasturlarini yo‘lha qo‘yich imkoniyatlarini aniqlash maqsadida Sofiya universiteti rahbariyati Buxoro davlat universiteti delegatsiyasini Bolgariyaga taklif qilib, joriy yilning 22-25-may kunlari uchrashuvlar o‘tkazilishi rejalashtirilmoqda.
Shuningdek, Turkiya Respublikasining Malatya shahri Buxoro shahri bilan birodarlashgan shahar bo‘lib, mamlakatning yetakchi oliy taʼlim muassasalaridan hisoblanuvchi Ino‘nu universiteti ham shu shaharda joylashgan. Universitet tarkibida Texnopolis hamda Turkiyaning eng yirik Quyosh energiyasi markazi, jahonning organ transplantatsiyasini amalga oshirish bo‘yicha Top-3 likka kiruvchi tibbiyot markazi faoliyat ko‘rsatadi.
Joriy yilning noyabr oyida BuxDU, Ino‘nu universiteti, Buxoro viloyati hokimligi, G‘ijduvon tumani hokimligi, Malatya viloyati hokimligi, Darende tumani hokimligi hamkorligida “Ziyorat turizmi” haftaligi doirasida, shuningdek PQ-135-son qaror ijrosi bo‘yicha yirik xalqaro Naqshbandiya konferensiyasini tashkil qilish rejalashtirilgan. Ushbu xalqaro konferensiyada jahonning turli mamlakatlaridan 200 nafarga yaqin ishtirokchi qatnashishi kutilmoqda.
Ino‘nu universiteti rahbariyati BuxDU delegatsiyasini Malatya shahriga taklif qilib, joriy yilning 28-29-may kunlari universitet hamda Malatya viloyati hokimligida uchrashuvlar rejalashtirilgan.
