Bugungi kunda barcha sohalarda o‘zgarishlar, islohotlar amalga oshirilmoqda. Ushbu islohotlarning birinchisi xotin-qizlarning jamiyatdagi obro‘sini oshirish, ularning hayotdan rozi bo‘lib yashashlari uchun munosib turmush sharoitlarini yaratish, gender tengligini ta’minlash bo‘lsa, ikkinchisi – yoshlar masalasidir.
Shu munosabat bilan O‘zbekiston Respublikasi Oliy ta`lim, fan va innovatsiyalar vazirligi hamda Buxoro davlat universitetida hamkorligida respublika oliy ta’lim muassasalarining xotin-qizlar maslahat kengashi raislari ishtirokida “Xotin-qizlarning ijtimoiy siyosiy faolligini oshirish, gender tenglik masalalari va gender madaniyati” mavzusida o‘quv-seminar va forumi bo`lib o`tdi. Unda Oliy ta`lim fan va innovatsiyalar vazirligi xodimlari, Buxoro viloyati hokimligi mutasaddi xodimlari, idoralar, respublika oliy ta`lim muassasalari Xotin-qizlar maslahat kengashi raislari hamda OAV vakillari ishtirok etishdi.
Dastavval, mehmonlar Buxoro davlat universitetida tashkil etilgan innovatsion g'oya va ishlanmalari, talabalar, doktorantlar ilmiy ijodi ko'rgazmasi, rasmlar kolleksiyasiga yuqori baho berishdi. Respublika oliy taʼlim muassasalaridan tashrif buyurgan 200 nafardan ortiq Xotin-qizlar maslahat kengashi raislarining oʻzgacha tantana va mehmondoʻstlik tamoyillari asosida kutib olindi.
Forum kirish qismini Buxoro davlat universiteti rektori, iqtisodiyot fanlari doktori, professor Obidjon Xamidov ochib berib, mazkur tadbirga tashrif buyurgan mehmonlarni ko’rib turganligidan oʻz mamnuniyatini izhor etib, forum ishiga rivoj tiladi.
Forumda Oliy taʼlim, fan va innovatsiyalar vazirligi, Yoshlar siyosati, maʼnaviy-tarbiyaviy ishlar boshqarmasi mutaxassisi D.Solixoʻjayeva, Ichki ishlar vazirligi huquqbuzarliklar profilaktikasi bosh boshqarmasi boshlig’i oʻrinbosari U.Abdullayeva, “Umid” tashabbuslarni rivojlantirish va qoʻllab-quvvatlash markazi direktori D.Amirkulova, Oʻzbekiston xalqaro islom akademiyasi Xotin-qizlar maslahat kengashi raisi N.Shoaliyeva, Toshkent davlat sharqshunoslik universiteti Xotin-qizlar maslahat kengashi raisi Sh.Zaynutdinova, A.Navoiy nomidagi Oʻzbek tili va adabiyoti universiteti Yoshlar masalalari, ma’naviy-ma’rifiy ishlar bo’yicha birinchi prorektori G.Joʻrayeva, Andijon davlat pedagogika instituti xotin-qizlar maslahat kengashi raisi S.Yusupova hamda BuxDU rektorining Xotin-qizlar masalalari bo‘yicha maslahatchisi O.Adizova so‘zga chiqib, xotin-qizlarning jamiyatdagi o‘rni va ularning faoliyatiga to‘xtalishdi.
Ta’kidlanganidek, mazkur tadbirning Buxoroda va aynan Buxoro davlat universitetida o‘tkazilayotgani bejiz emas. Chunki bu eng ko‘p talaba qizlar tahsil oladigan nufuzli oliygoh hisoblanadi.
“Buxoro davlat universitetida olib boruvchi xotin-qizlar uchun yaratilgan shart-sharoitlar natijasida Zulfiya Davlat mukofotini qo‘lga kiritgan 2 nafar yoshlarimizni alohida ta’kidlab o‘tmoqchiman. Bular qiyosiy adabiyotshunoslik, chog‘ishtirma tilshunoslik va tarjimashunoslik ixtisosligi bo‘yicha tayanch doktoranti Pulatova Mohichexra Temirovna hamda Axborot texnologiyalari fakulteti 4-bosqich talabasi To‘xtamishova Gulnora Mels qizi shaxsan yurtboshimiz tomonidan e’tirof etildi. Umuman olganda 2023-2024 o‘quv yillarida universitetimizning 17 nafar yoshlar Prezident va nomdor stipendiantlar qatoridan o‘rin olgan”, deydi BuxDU rektori Obidjon Xamidov.
Buxoro davlat universitetida 824 nafar professor-o‘qituvchi bo‘lib shundan 583 nafari ayollarni tashkil etadi. 66 nafar fan doktori bo‘lib, 23 nafari ayol, professor (6,7%), 260 nafar fan nomzodi, 119 nafari ayol, falsafa doktori, dotsent (31,8%) va 656 nafar o‘qituvchilar (67,5%) faoliyat yuritadi. Ilmiy salohiyat 47,4 %. Shuningdek, 23 nafar ayol fan doktori va professor, 31 nafar ayol fan nomzodi, 77 nafar ayol falsafa doktori, 81 nafar ayol dotsentlar faoliyat ko‘rsatib kelishmoqda. Rahbarlik lavozimida ishlayotgan ayollar esa 16 nafar.
Tadbir davomida BuxDU San’atshunoslik fakulteti talabalarining musiqiy chiqishlari, talabalar teatr studiyasining sahna chiqishlari tadbirga haqiqiy bayramona kayfiyat bag‘ishladi. Forumning yakuniy qismida ishtirokchilar bilan Zakovat intellektual o’yini, Milliy liboslar podium va konsert dasturi, Velo lady soglomlashtirish tadbirlari o’tkazildi. Forumning ikkinchi kunida forum ishtirokchilarining Buxoro viloyati “Yetti pir” ziyoratgohlari bo’ylab sayohati rejalashtirilgan.
BuxDU Matbuot xizmati
