Bugun Buxoro davlat universitetida Xorijiy tillar fakulteti Fransuz filologiyasi kafedrasi tomonidan filologiya fanlari doktori, professor Bobokalonov Ramazon Rajabovich tavalludining 65 yilligiga bag‘ishlangan “Yangi O‘zbekiston tilshunosligida lingvokulturologiya, pragmalingvistika, neyropsixolingvistika va lingvofolkloristika sohalarining dolzarb muammolari” mavzusidagi xalqaro ilmiy-nazariy anjumani bo`lib o`tdi.
Ushbu anjumanda xorijlik hamda respublika oliy ta`lim muassasalaridan tashrif buyurgan professor-o’qituvchilar, Oliy ta’lim, fan va innovatsiyalar vazirligi Buxoro viloyati hududiy boshqarma boshlig'i Azamat Naimov, BuxDU rahbariyati hamda talabalari ishtirok etishdi. Anjumanni kirish so’zi bilan BuxDU Ilmiy ishlar va innovatsiyalar bo‘yicha prorektori T.H.Rasulov ochib berdi. Shuningdek, filologiya fanlari doktori, professor Bobokalonov Ramazon Rajabovichga Buxoro davlat universiteti jamoasi, Oliy ta’lim, fan va innovatsiyalar vazirligi Buxoro viloyati hududiy boshqarmasi hamda shogird professor-o’qituvchilar nomidan esdalik uchun sovg’alar topshirildi. Ustozning universitet ravnaqiga qo’shgan hissasi hamda erishilgan yutuqlar va natijalar zalda yig`ilganlarga namoyish etildi.
Buxoro davlat universiteti Fransuz filologiyasi kafedrasi xalqaro o‘qituvchisi, Fransiyaning Littoral Kot-d’Opale universiteti tadqiqotchisi Messi Thierry Joël “Développement des compétences langagières orales des apprenants ouzbeks”, Fransiyaning Grenobl-Alpes universiteti professori Joo Deok “Discours pour la Conférence “Enjeux et défis de la linguistique moderne en nouvel Ouzbékistan”, Fransiyaning Parij Nanter universiteti professori Bruno Kochi “L’histoire, la géographie et le présent de la linguistique française”, AnDChTI dotsenti filologiya fanlari bo‘yicha falsafa doktori (PhD) H.U.Davlatova “Muloqotda gender xususiyatlarining aks etishi”, Fransiyaning Parij Sorbonna Nuvel universiteti professori, filologiya fanlari doktori (DSc) Alex Kormanski “Fondements linguistiques et culturels des jeux didactiques modernes” mavzularida ma’ruza qilishdi.
Faollar yig`ingohida yig`ilganlarga Buxoro viloyati G‘ijduvon tumani fransuz tiliga ixtisoslashgan maktab jamoasi ko‘rgazmali chiqishi bilan tadbirga ko’tarinki kayfiyat bag’ishladi.
Buxoro davlat universiteti Matbuot xizmati
