Rossiya Federatsiyasining rus tilini chet tili sifatida o'rgatish sohasida faoliyat yurituvchi xususiy kompaniyasi hisoblangan "Златоуст" markazi direktori, filologiya fanlari nomzodi Stanislav Golubev boshchiligidagi delegatsiya Buxoro davlat universitetiga tashrif buyurdi.
“Златоуст” nashriyot markazi “Tashqi iqtisodiy va xalqaro faoliyat” kafedrasi loyihasi doirasida markaz hamda Buxoro davlat universiteti professor-o`qituvchilari ishtirokida “Rus tilini chet tili sifatida o‘qitish: muammolar va istiqbollar” mavzusida xalqaro seminar bo`lib o`tdi.
Seminardan ko‘zlangan maqsad russhunoslik bo‘yicha milliy mutaxassislar, talabalar, maktab o‘quvchilarini tizimli ilmiy, o‘quv va uslubiy qo‘llab-quvvatlash, shuningdek, O‘zbekistonning Rossiyaga, uning tili va madaniyatiga bo‘lgan qiziqishini oshirish, O‘zbekistonda rus tilini ommalashtirish va ikki xalq o‘rtasidagi tinchlik, do‘stlik va totuvlikni mustahkamlashga ko‘maklashishdan iborat.
Seminarni BuxDU rektori Obidjon Xamidov tabrik so‘zi bilan boshlab berdi: Ushbu muhim voqea O‘zbekiston va Rossiya o‘rtasidagi ta’lim sohasidagi hamkorlikni mustahkamlashga xizmat qilishini ta’kidladi.
Markaz tomonidan Buxoro davlat universiteti Axborot resurs markazi fondi uchun talabalarga mo`ljallangan yuzga yaqin o`quv-uslubiy adabiyotlar topshirildi.
