Aziz yurtdoshlar!
Qadrli universitet jamoasi!
Mustaqillik kuni mamlakatimiz istiqlolga erishgan, jahon xaritasida yangi, mustaqil va suveren davlat – O`zbekiston Respublikasi paydo bo`lgan, xalqimizning asriy orzu-intilishlari ro`yobga chiqqan, betakror kunlarimizga sababchi buyuk tarixiy sana bo`lib, el-yurtimiz tomonidan eng ulug`, eng aziz bayram sifatida har yili keng nishonlanib kelinadi. Ayni paytda Mustaqilligimizning o`ttiz ikki yilligi bayramini quvonch va iftixor bilan kutmoqdamiz. Inson qadrini ulug‘lagan qutlug` shodiyonaning “Yangi hayot uchun, Yangi O‘zbekiston uchun!” ezgu g‘oyasi ostida o‘tkazilayotganligi buguni kechasidan go`zal yurtimizda yashovchi har bir vatandoshimizga cheksiz quvonch bag‘ishlaydi. Shu fursatdan foydalanib qadr va hurlik ayyomi bilan butun universitetimiz jamoasini, yurtdoshlarimizni chin qalbimdan muborakbod etaman.
Bugun biz o‘z oldimizga ulug‘vor va yuksak maqsadlarni qo‘ymoqdamiz. O`tgan muddat davomida ne-ne mashaqqatlar bilan erishilgan hurlik yildan-yilga mustahkamlanib, inson va uning sha'ni aziz bo`lgan jamiyat barpo etdik. Va bu yagona ahil oila, yagona xalq bo‘lib, astoydil harakat qilayotgan ko`p millatli xalqimizning sabr-matonati, jonbozligi, yurtboshimizning xalqchil davlat qurish yo`lidagi shiddati natijasidir. Darvoqe, Mustaqillik hadya etgan ne’matlardan bahramand bo‘lish, ular bilan faxrlanish yaxshi, albatta. Siz bilan bizning bosh vazifamiz, burchimiz, ana shu ne’matlarni ko‘z qorachig‘idek asrab-avaylash, bilim olish, jamiyatga kerakli inson bo‘lib xizmat qilishdir. Mana shunday murakkab zamonda doimo ogoh va hushyor bo‘lib yashash, bebaho boyligimiz bo‘lmish barqarorlikni saqlash, jamiyatimizda katta yagona oila tuyg‘usini kuchaytirish benihoya muhim. Kundan-kunga yuksalayotgan xalqimiz hayotini yanada obod va farovon qilish, yurtimizda yashayotgan, millati, tili va dinidan qat’iy nazar, har bir insonga e’tibor va g‘amxo‘rlik ko‘rsatish sharafli maqsadimizdir. Barchamizga, jonajon yurtimizning kamolini, unda yashovchi ko`p millatli bebaho xalqning mamnuniyatini, farzandlarimiz va nabiralarimizning baxt-u iqboli, buguni va yorqin ertasini ko‘rish nasib etsin!
Aziz yurtdoshlar! Yana bir bor sizlarni Vatanimizning Istiqlol bayrami bilan chin qalbimdan tabriklar ekanman, barchangizga sihat-salomatlik, baxtu-saodat, xonadonlaringizga fayz-u baraka tilayman. Mustaqil Vatanimizning tinchligi, gullab-yashnashi va ravnaqi uchun qilayotgan xizmatlaringizda omad yor bo‘lsin! Tinch va farovon yurtimiz osmoni musaffo, Mustaqilligimiz abadiy bo‘lsin!
Buxoro davlat universiteti rektori,
iqtisodiyot fanlari doktori, professsor O.X.Xamidov
