Buxoro davlat universiteti hamda Buxoro viloyati xalq ta’limi boshqarmasi hamkorligida umumiy o`rta ta’lim maktablari bitiruvchi sinf o`quvchilari uchun Buxoro davlat universitetining Matematika, Fizika, Kimyo, Biologiya, Informatika va Axborot texnologiyalari fan olimpiadalarining birinchi bosqichi bo`lib o`tdi.
Yuqori saviyada, keng miqyosda tashkil etilgan fan olimpiadasida ishtirok etish uchun viloyat miqyosida 1676 nafar o‘quvchi ro‘yxatdan o‘tdi. Shundan 291 nafari Kimyo, 511 nafari Biologiya, 166 nafari Fizika, 601 nafari Matematika, 107 nafari Informatika fani bo‘yicha o`z bilimini sinash uchun ro`yxatdan o`tishgan.
– Bu olimpiada men uchun kutilmagan yangilik bo`ldi. O`z bilimimni sinash, o`qishga topshirishdan oldin salohiyatimni aniqlab olish niyatida edim. Tengdoshlarim bilan olimpiadaga kirishdan oldin biroz suhbatlashdim. Ularning salohiyatini bilgim keldi. Yozma ish va labaratoriya mashg`uloti yozgach, bilimimdan biroz qoniqdim. Natijalar ijobiy chiqishiga umidim katta, – deya o`z xursandchiligini baham ko`rdi Shofirkon tumani 30-umumiy o`rta ta’lim maktabi bitiruvchisi Dostonbek G`ofurov.
O`tgan yillardan beri qizg`in kutilayotgan ushbu fan olimpiadasi ko`pgina fanlarni qamrab olgani bilan ahamiyatli. O‘tgan yilda o`tkazilgan Matematika fani olimpiadasida 3 nafar g‘oliblar universitet mablag‘lari hisobidan o‘qishga qabul qilish tavsiyasini qo‘lga kiritgan edi. Joriy yilda ham ushbu xayrli an’ana davom etib, Matematika fanidan tashqari Fizika, Kimyo, Biologiya, Informatika va axborot texnologiyalari kabi bugungi kunda jahon miqyosida benihoya qiymatli fanlarni qamrab oldi, – deya o`z mulohazalarini o`rtoqlashdi BuxDUning Iqtidorli talabalarning ilmiy tadqiqot faoliyatini tashkil etish bo`limi boshlig`i Umida Xalikova, – ushbu fan olimpiadasi maktab bitiruvchilari uchun manfaatli bo`ldi. Buni ularning safi ko`p ekanligidan ham bilish mumkin.
Yuqori saviyada tashkil etilgan fan olimpiadasining birinchi bosqichida yuqori natija ko`rsatgan o`quvchilar 2-bosqichga tavsiya etilishi ko`zda tutilgan. Fan olimpiadasining 2- bosqichi 24-aprel kuni bo`lib o`tadi.
