Bugun Hindiston tashqi ishlar va madaniyat davlat vaziri Minakshi Lekhi boshchiligidagi delegatsiya Buxoro davlat universitetiga tashrif buyurdi.BuxDUga tashrif avvalida mehmonlar universitetdagi Hind markazi bilan tanishishdi. Universitet talabasi tomonidan markaz faoliyati xususidagi taqdimot tinglangach, asosiy bino tomon yo`l olindi. BuxDu rektori Obidjon Xamidov shu fursat davomida Hindiston tashqi ishlar va madaniyat davlat vaziri Minakshi Lekhi xonim hamda delegatsiya a’zolariga muassasaning binolari, yaratilgan shart-sharoitlar, olib borilayotgan islohotlar, uning bugungi kundagi faoliyati, respublikada tutgan o`rni haqida ma’lumot berdi. OTM faoliyatiga bog`liq istiqbolli rejalar haqidagi fikrlarini o`rtoqlashdi. Iliq suhbatdan so`ng, mehmonlar asosiy binoda tashkil etilgan talabalarning ijod namunalari – xalq amaliy san’ati hamda tasviriy san’at namunalaridan yig`ilgan ko‘rgazmani ko`zdan kechirishdi. Shu asnoda ular San’atshunoslik fakulteti talabalari tomonidan ijro etilgan hind musiqalaridan bahramand bo`ldilar. Ko`tarinki kayfiyat bilan boshlangan uchrashuv katta faollar yig`ingohida davom etdi. BuxDU rektori O.X.Xamidov mehmonlarni tashrif bilan tabriklab, uchrashuvni samimiy ochib berish asnosida Tashqi ishlar va Madaniyat vaziri Menakshi Lekhi janobi oliyalariga, Hindistonning O'zbekistondagi elchisi janob Manish Prabhatga, Professor Chander Shekharga tashrif buyurganlari uchun universitet jamoasi nomidan minnatdorchilik izhor qildi:“Bugun universitetimizda tarixiy kunlardan biri, chunki biz Hindistonning taniqli siyosatchisi va Hindistonning tashqi ishlar va Madaniyat vaziri Menakshi Lekhi boshchiligidagi yuqori darajadagi delegatsiyani qabul qilish baxtiga musharraf bo`ldik.O'zbekiston-Hindiston munosabatlari o'zaro ishonch va xayrixohlik asosida rivojlanmoqda. Madaniyat va ta'lim sohasidagi hamkorlikka alohida ahamiyat berilmoqda. Bugungi uchrashuv ham universitetimizga Hindiston hukumati tomonidan berilgan muhimlik va hurmat alomatlaridan biridir. Biz, albatta, bu samimiyat hamda mehribonlikni qadrlaymiz.Bu zalda Hindiston madaniy aloqalar Kengashining maxsus sovg'asining, fan va ta'limning turli sohalaridagi 365 ta kitobning borligi, kelajakda universitetimizning yangi yutuqlarida bu kitoblarning ulushi bo'lishini kafolatlaydi.”Shundan so`ng, Tashqi ishlar va Madaniyat davlat vaziri Menakshi Lekhiga so`z berildi.Uchrashuv yakunida BuxDU rektori Obidjon Xamidov tomonidan mehmonlar uchun esdalik sovg`alari ulashildi. Shundan so`ng delegatsiya a’zolari Buxoro viloyatining diqqatga sazovor joylarini tomosha qilish uchun yo`l olishdi.BuxDU Matbuot xizmati