Asrlar osha shakllanib, avloddan-avlodga me’ros bo‘lib kelgan milliy qadriyatlarimizdan biri bu – ommaviy bayramlar oldidan yurtimizda umumxalq hasharlarini o‘tkazish, obodonlashtirish tadbirlarini amalga oshirishdir.Hukumatning tegishli farmoyishiga (96-F, 10.03.2021y) binoan, “Navro‘z” umumxalq bayramini munosib nishonlashga tayyorgarlik ko‘rish, shuningdek mahallalar, aholi turar joylarini obodonlashtirish va ko‘kalamzorlashtirish maqsadida 2021 yil 13-14 mart kunlari mamlakatimizning barcha hududlarida “Obod va ko‘rkam mahallam” obodonlashtirish va ko‘kalamzorlashtirish umumxalq xayriya hasharini o‘tkazish belgilangan edi.O‘zida poklik, insoniylik kabi ezgu jihatlarni mujassam etgan hashar tadbirlari Buxoro davlat universitetida ham uyushqoqlik bilan tashkil etilmoqda. Erta tongdan universitet hovlisiga saf tortgan xizmatchilarga tadbir hamda undan ko‘zlangan maqsad-vazifalar tushuntirilib, ularga zarur tavsiya va ko‘rsatmalar berildi. Shundan so‘ng, barcha fakultetlar, bo‘lim va xodimlari o‘zlariga biriktirilgan hududlarda obodonlashtirish, tozalash ishlarini boshlab yubordilar.Hashar davomida uchastkalarda yerlarni chopish, daraxtlarga shakl berish, bardyurlarni oqlash, supurish, chiqindilarni belgilangan hududlarga olib chiqish ishlari qizg‘in amalga oshirildi. O‘zaro hamjihatlik, inoqlik asosida tashkil etilgan xayrli tadbir natijasida, universitet hovlisi, xizmat xonalari ozoda, shinam va obod holga keltirildi. Universitet ichidagi yerlarda 300 dan ortiq archa ko‘chatlari ekilmoqda.BuxDU Matbuot xizmati
