11.01.2022

Bugun Telagram ijtimoiy tarmog‘idagi “Bukhara news” kanalida “Ixtiyoriy ta’lim deb yana o‘z bilganingizni qilyapsizmi Rektor janoblari?” sarlavhasi ostida xabar e’lon qilindi. Ushbu xabarga javoban BuxDU rahbariyati quyidagilarni ma’lum qiladi.Buxoro davlat universitetining www.buxdu.uz rasmiy veb-sayti bosh sahifasida 2020 yil 16 noyabrdan boshlab oliy ta’lim muassasasi tomonidan ishlab chiqilgan chora-tadbirlar va reja-grafik asosida o‘quv jarayonini masofaviy hamda an’anaviy shakllarda davom ettirish to‘g‘risida e’lon berilgan hamda ushbu jarayonni muvofiqlashtirish maqsadida maxsus shtab faoliyat ko‘rsatmoqda. Mazkur masala bo‘yicha o‘tkazilgan tashviqot ishlarida, universitet rahbariyati tomonidan o‘tkazilgan yig‘ilishlarda, quyi bo‘g‘inlarga berilgan topshiriqlarda masofali yoki an’anaviy o‘quv shakllardan birini tanlash talabaning o‘z ixtiyorida ekanligi, faqat talaba qaysi bir jarayonda ishtirok etmoqchiligini o‘z arizasi asosida ma’lum qilishi lozimligi ta’kidlab kelingan. Ushbu talab ommaviy axborot vositalari orqali chiqishlarda, universitet rasmiy veb sayti va ijtimoiy tarmoqlardagi sahifalari orqali ham talabalar va ularning ota-onalariga etkazilgan. Shu bilan birga talaba masofali o‘qish istagini bildirgan taqdirda arizasini masofadan turib elektron tarzda etkazishi etarli ekanligi ma’lum qilingan. Uyidan turib internet orqali bog‘lanish imkoniyati bo‘lmagan talabalar uchun joylarda masofaviy ta’limni qo‘llab-quvvatlash “Access point” markazlari tashkil qilingan va faoliyati nazoratga olingan.Tabiiy fanlar fakulьteti Kimyo ta’lim yo‘nalishi talabalari uchun tashkil qilingan “2.1 KIM-18 ONLINE DARS” telegram guruhida o‘qituvchi tomonidan joylashtirilgan “rektor boshchiligida davomat olinishi va oilali, homilador, yosh bolalilar ham darsga kelishi lozimligi” to‘g‘risidagi xabar talabalarga nisbatan universitet rahbariyati tomonidan qo‘yilgan talablarga to‘g‘ri kelmaydi. Biz ushbu holatda o‘qituvchining pandemiya sharoitida ta’lim jarayonini tashkil qilish yuzasidan berilgan topshiriqni to‘liq va to‘g‘ri anglamasdan kichik bir telegram guruhi orqali talabalarga e’lon sifatida etkazishini uning noprofessionalligi sifatida baholaymiz.Buxoro davlat universiteti rahbariyati bilan o‘qituvchi o‘rtasida bo‘lib o‘tgan suhbat jarayonida u yo‘l qo‘ygan xatosini tan olganligi va o‘qituvchiga nisbatan ichki tartib-qoidalarga binoan chora ko‘rilganligini ma’lum qilamiz. Buxoro davlat universiteti Matbuot xizmati