11.01.2022

Hammamizga ma’lumki muhtaram Prezidentimiz tomonidan oxirgi 4 yil ichida ta’lim sohasida juda keng qamrovli islohotlar amalga oshirib kelinmoqda.  2020 yilning 19 yanvar kuni Buxoro davlat universitetida O‘zbekiston Respublikasi Vazirlar Mahkamasi huzuridagi ta’lim sifatini nazorat qilish davlat inspeksiyasi boshlig‘i Ulug‘bek Negmatovich Tashkenbayev viloyat oliy ta’lim muassasalari rektorlari, professor-o‘qituvchilari, texnikum, litsey, maktab direktorlari hamda o‘qituvchilari bilan yig‘ilish o‘tkazdi.Ta’lim sifatini nazorat qilish inspeksiyasi boshlig‘i muhtaram Prezidentimizning 25 dekabrda  Yoshlar forumida so‘zlagan nutqlari, 29 dekabrda Oliy Majlis Senatiga yo‘llagan murojaatnomalari mazmun mohiyatini kengroq yetkazish hamda Buxoro viloyatidagi ta’lim tashkilotlarida ta’lim sifatining holati, o‘qituvchilarning kasbiy mahoratini oshirishning dolzarb muammolari bo‘yicha tahliliy ma’lumotlarni aytib o‘tdi. Yig‘ilishda shuningdek, ta’lim sifatini nazorat qilish davlat Inspeksiyasi boshlig‘i o‘rinbosari O.A.Qo‘ysinov Uzluksiz ta’lim tizimida o‘quv dasturlari va fanlarning uzluksizligi va uzviyligini ta’minlash to‘g‘risida batafsil ma’lumot berdi. Shundan so‘ng, ta’lim muassasalari attestatsiyasi va davlat akkreditatsiyasi bosh boshqarmasi boshlig‘i A.A.Odilov Yoshlarga sifatli ta’lim olish sharoitlarini yaratish, ularni kasbga o‘rgatish va tashabbuslarini qo‘llab-quvvatlashni samarali tashkil etish choralari to‘g‘risida ma’ruza qildi.Ta’lim sifatini nazorat qilish davlat inspeksiyasi boshlig‘i Ulug‘bek Tashkenbayev o‘z ma’ruzasida tayanch maktablarni o‘zlariga biriktirilgan maktablar bilan ishlashni tizimli ravishda amalga oshirish, xalqaro PISA, PIRLS, TIMSS dasturlari yo‘nalishlariga mos ravishda tegishli fanlar, ayniqsa aniq, tabiiy va filologiya fanlari, shuningdek boshlang‘ich ta’lim fan yo‘nalishlari bo‘yicha belgilangan trenerlarning malakasini oshirish, ustoz-shogird an’anasi asosida tajriba almashishlarini yo‘lga qo‘yish, tajribali ustozlar va tajribali mutaxassislarni tayanch maktablari o‘quv jarayonlariga jalb qilish borasida amalga oshirilishi lozim bo‘lgan vazifalar xususida so‘z yuritdi.Ushbu yig‘ilishda BuxDU rektori O.X.Xamidov, Vazirlar Mahkamasi huzuridagi ta’lim sifatini nazorat qilish davlat Inspeksiyasi boshlig‘i o‘rinbosari O.A.Qo‘ysinov, Ta’lim muassasalari attestatsiyasi va davlat akreditasiyasi bosh boshqarmasi boshlig‘i A.A.Odilov, Umumiy o‘rta va maktabdan tashqari ta’lim muassasalarini attestatsiyadan o‘tkazish bo‘limi boshlig‘i R.M.Ergashev, Maktabgacha ta’lim muassasalarini attestatsiyadan o‘tkazish bo‘limi boshlig‘i I.X. Xujamov, Buxoro viloyati Xalq ta’limi boshqarmasi  boshlig‘i D.N. Mustafoyeva, Buxoro davlat tibbiyot instituti rektori Sh.J. Teshayev, Buxoro muhandislik texnologiya instituti rektori N.R. Barakayev, Kasbiy ta’limni rivojlantirish va muvofiqlashtirish hududiy boshqarmasi boshlig‘i H.H. Qobilov, Viloyat pedagog kadrlarni qayta tayyorlash va ularning malakasini oshirish markazi direktori A.K.Safarov,  viloyat oliy ta’lim muassasalari prorektorlari, fakultet dekanlari ishtirok etdilar.Yig‘ilishda xalqaro tadqiqotlar yo‘nalishlari bo‘yicha hududda olib borilgan ishlar, o‘quvchilarning tayyorgarlik holatlari, tayanch maktablarning o‘zlariga biriktirilgan maktablar bilan hamkorlik aloqalarini rivojlantirish, tajriba almashish ishlarini jadallashtirish hamda faoliyati samaradorligini oshirish, shuningdek, oliy ta’lim muassasalari, xalq ta’limi tizimidagi malaka oshirish va qayta tayyorlash hududiy markazlari hamda maktab o‘rtasida hamkorlik aloqalarini kuchaytirish masalalariga alohida e’tibor qaratildi.Yig‘ilish ochiq muloqot va bahs-munozaralarga boy tarzda tashkil etilib, unda ishtirokchilarning qiziqtirgan savollariga atroflicha javob berildi.BuxDU Matbuot xizmati