11.01.2022

Iqtidorli yoshlarni saralab olish tizimini rivojlantirish, ularni qo‘llab-quvvatlash uchun zarur sharoitlar yaratish, ulg‘ayib kelayotgan yosh avlodning ilm-fanga bo‘lgan intilishlarini rag‘batlantirish, intellektual va ijodiy salohiyatini ro‘yobga chiqarish borasidagi islohotlarni tizimli amalga oshirish, shuningdek akademik liseylar faoliyatini takomillashtirish maqsadida oliy va o‘rta maxsus ta’lim tizimida qator tizimli ishlar amalga oshirilmoqda.2021 yilning 5-yanvar kuni Buxoro davlat universiteti rektori, iqtisodiyot fanlari doktori, professor Obidjon Xamidov, BuxDU o‘quv ishlari bo‘yicha prorektori M.I.Daminov, BuxDU Moliya va iqtisod ishlari bo‘yicha prorektori O‘.U.Rashidovlar BuxDU huzuridagi Qorako‘l akademik litseyiga tashrif buyurdilar. Tashrif chog‘ida universitet rektori litseyda o‘quvchilar uchun yaratilgan shart-sharoitlar bilan yaqindan tanishdi, pedagog-xodimlar bilan akademik litseyda ta’lim va tarbiya jarayonini sifatli tashkil qilish bo‘yicha amalga oshirilishi lozim bo‘lgan dolzarb vazifalar yuzasidan yaqindan suhbatlashdi. Suhbat jarayonida maktab o‘quvchilari orasidan iqtidorli o‘quvchilarni aniqlash, ularni akademik litseyga saralab olish, chuqurlashtirilgan ta’lim dasturlari asosida o‘qitish, o‘quvchi yoshlarda keng dunyoqarash, intellektual salohiyat, ijodiy va tahliliy fikrlashni rivojlantirish, ilm-fanga bo‘lgan qiziqishni oshirish, ularning fan olimpiadalaridagi ishtirokini kengaytirish, o‘quvchilarni amalga oshirilayotgan islohotlarning faol ishtirokchisiga aylantirish, vatanparvarlik, izlanuvchanlik va yaratuvchanlik ruhida tarbiyalash kabi dolzarb masalalar xususida to‘xtalib o‘tildi.Suhbat jarayonida litsey o‘quvchilarini turli fan, sport va san’at yo‘nalishlaridagi to‘garaklarga faol jalb etish, ularning o‘qishdan tashqari vaqtlarini mazmunli tashkil qilish, o‘quv jarayoniga zamonaviy o‘qitish va axborot kommunikatsiya texnologiyalarini samarali joriy etish, ilg‘or xorijiy tajribani o‘rganish va amaliyotga tadbiq qilish bo‘yicha takliflar tayyorlash, o‘qituvchilarning “hayot davomida o‘qish” tamoyili asosida uzluksiz malaka oshirishini tashkil qilish, ularning xorijiy tillarni egallash bo‘yicha amaliy ko‘nikma va kompetensiyalarini rivojlantirib borish kabi masalalar muhokama qilindi.Universitet rektori akademik litseyning o‘quvchilar turar joyida yaratilgan shart-sharoitlar bilan tanishib, qo‘shimcha jihoz va inventarlar bilan ta’minlash hamda issiqlik tizimini ta’mirlash bo‘yicha topshiriqlar berdi. Shuningdek, shu kuni akademik litseyda universitet tomonidan tashkil etilgan smart-o‘quv xonasining ochilish marosimi o‘tkazildi. Qishki ta’til davrida Qorako‘l akademik litseyida o‘qituvchilar uchun o‘quv jarayonida axborot-kommunikasion texnologiyalardan foydalanish, xorijiy tillarni o‘rganish bo‘yicha qisqa muddatli kurslar tashkil qilingan. BuxDU Matbuot xizmati