11.01.2022

Buxoro davlat universiteti Xorijiy tillar fakultetida Amerika Elchixonasi homiyligi asosida o’zining faoliyatini olib borayotgan Drama Club o’zining birinchi sahna ko’rinishini AQSHning O'zbekistondagi favqulodda va muxtor elchisi maslahatchisi Joanne Kramb, bo’lim xodimi Dr. Feruz Akobirov hamda O’zbekistonning boshqa OTMlar ingliz tili o’qituvchilari, BuxDU Xorijiy tillar fakulteti dekani M.M. Jo’rayeva, ingliz tilshunosligi kafedrasi mudiri Z.I.Rasulov, fakultet o’qituvchi va talabalariga taqdim etdi. Drama Club shu kuni mashhur amerikalik yozuvchi Mark Twen qalamiga mansub “Haklberri Fin sarguzashtlari” asari asosida o’zining spektaklini namoyish etdi. Yetti sahna ko’rinishi orqali asarda sodir bo’lgan voqealar jonlantirildi. Xorijiy tillar fakulteti talabalari Nasullayev Abbos, Sodiqova Shaxlo, Mirakova Shaxzoda, Mamedov Ramiz, Saidova Kamila, Yunusova Saidabonu, Aslonova Rushana, Saidova Jasmin, Mamedova Taxmina, Sharipova Parvina, Musayeva Mohichehralar to’liq ingliz tilida turli rollarni ijro etishdi. Sahna ko’rinishlari orqali Amerika jamiyatida XIX  asr oxirida Mark Twen o’z asarida tanqid qilgan irqchilik, qullik, aroqxo’rlik kabi illatlar mahorat bilan namoyish etildi. Drama Club granti sohibi, ingliz tilshunosligi kafedrasi katta o’qituvchisi, Xorijiy tillar fakulteti o’quv ishlari bo’yicha dekan o’rinbosari M.M.Tursunov spektakl oxirida talabalarni birma-bir tanishtirib, yoshlarni san’atning teatr turiga qiziqtirish ularning darsdan tashqari vaqtlarini mazmunli o’tkazishlariga hamda xorijiy tilni yanada mukammalroq o’rganishlariga zamin yaratishini ta’kidlab o’tdi. Tadbir so’nggidaAQSHning O'zbekistondagi favqulodda va muxtor elchisi maslahatchisi Joanne Kramb talabalarning aktyorlik mahoratiga va til bilish darajasiga yuksak baho berib, Drama Clubning keyingi namoyishiga ham albatta tashrif buyurishini ma’lum qildi.Xorijiy tillar fakultetining Drama Clubi Amerika Qo’shma Shtatlari yozuvchilari yozgan asarlari asosida sahna ko’rinishlarini taqdim etishda davom etadi.BuxDU Matbuot xizmati