Respublikamiz oliy taʼlim tizimini 2030-yilgacha rivojlantirish konsepsiyasida xorijiy oliy taʼlim muassasalari bilan hamkorlik doirasida professor-o‘qituvchilar va doktorantlar akademik mobilligini rivojlantirish, xususan bunda “El-yurt umidi” jamg‘armasi ko‘magidan foydalanilishi oliy taʼlim sifatini oshirish chora-tadbirlaridan biri sifatida taʼkidlab o‘tilgan.Buxoro davlat universitetida ham ushbu yo‘nalishda olib borilayotgan faoliyat o‘z natijalarini bermoqda. Universitetda bir qancha yetakchi xorijiy oliy taʼlim muassasalari qatorida Italiyaning Akvila universiteti bilan ham yaqin hamkorlik o‘rnatilgan. Mazkur universitet nufuzli Times akademik reytingida 501-600 guruhida o‘rin egallab, o‘zining ilmiy sohadagi salmoqli yutuqlari bilan tanilgan.Universitetning Erasmus+ akademik mobillik dasturi doirasida Akvila universitetiga ilmiy safarga yuborilgan Ziyodulla Nurovning ilmiy izlanishlari italiyalik olimlarda katta qiziqish uyg‘otganligi sababli, uning PhD dissertatsiyasi uchun qo‘sh rahbarlikni amalga oshirish taklif qilingan edi. Imzolangan kelishuv asosida dissertatsiyaga Akvila universitetidan professor Luidji Bidjiyero, Buxoro davlat universitetidan i.f.n. Abror Jo‘rayevlar ilmiy rahbar sifatida tayinlanishdi.Erasmus+ akademik mobillik muddati tugaganidan so‘ng Z.Nurov endi “El-yurt umidi” jamg‘armasi tanlovlari g‘olibi sifatida Akvila universitetida ilmiy faoliyatini davom ettirdi. Mashaqqatli mehnatlar o‘z natijasini berib, o‘z dissertatsiyani Italiyaning yetakchi iqtisodchi olimlaridan tashkil topgan ixtisoslashgan kengashda muvaffaqiyatli himoya qilgan Z.Nurov iqtisodiyot bo‘yicha PhD ilmiy darajasiga loyiq deb topildi. Dissertatsiya nusxalari Milan va Florensiya shaharlaridagi ilmiy kutubxonalargi joylashtirildi.30-oktabr kuni Buxoro davlat universiteti ilmiy kengashida universitet rektori, prof. O.Xamidov PhD diplomini topshirib, tadqiqotchining kelgusi ilmiy ishlarida muvaffaqiyat tiladi. Rektor O.Xamidov ayni paytda Ispaniya universitetlari doktoranturasiga yana ikki nafar tadqiqotchi qabul qilinganligini, xorijiy hamkorlar bilan qo‘shma rahbarlik asosida dissertatsiyalar tayyorlash ishlari davom ettirilishi va to‘liq qo‘llab-quvvatlanishini taʼkidlab o‘tdi. BuxDU Xalqaro hamkorlik bo`limi
