Bugun Turkiyaning Istambul universiteti rahbariyati bilan onlayn uchrashuv bo‘lib o‘tdi. Uchrashuvda BuxDU tomonidan rektor O.Xamidov, xalqaro hamkorlik bo‘yicha prorektor A.Jo‘rayev, Xorijiy tillar fakulteti katta o‘qituvchisi M.Ahmedova, Filologiya fakulteti o‘qituvchisi D.Tosheva, Istambul universiteti tomonidan rektor Mahmud Ak, Xalqaro hamkorlik boshqarmasi direktori Ayshe Zishan Furat, rektor maslahatchisi Murtazo Bedir ishtirok etdilar.Yaqinda universitetlar o‘rtasida hamkorlik shartnomasi imzolangan bo‘lib, bugungi uchrashuvda kelgusi rejalar bo‘yicha kelishib olindi. Xususan, ikki tomon o‘zlarini qiziqtiruvchi yo‘nalishlar bo‘yicha takliflarni berishlari hamda tegishli yo‘l xaritalarini ishlab chiqishga kelishib olindi.BuxDU tomonidan Istambul universitetidan o‘qituvchilarni ishga qabul qilish, hamkorlikda xalqaro konferensiyalar tashkil qilish, Istambul universitetida PhD dissertatsiyalarini qo‘shma rahbarlik asosida himoya qilish taklifi kiritildi. Istambul universiteti rahbariyati universitetning 30 dan ortiq ilmiy jurnali mavjudligini, ushbu jurnallarda maqolalar chop etish imkoniyatlari borligini bildirdi. Shuningdek, nodir qo‘lyozmalar kutubxonasida 100 ming nusxadan ko‘proq kitoblar saqlanishini, ularning kattagina qismi aynan o‘zbek olimlari yoki kelib chiqishi hozirgi O‘zbekiston hududidan bo‘lgan olimlarning asarlari ekanligini maʼlum qilib, ularni o‘rganishda hamkorlik qilish mumkinligi maʼlum qilindi. Yaqin kunlar ichida tomonlar bir-birlariga aniq takliflarni yetkazishga kelishib olindi.Qisqa maʼlumot: Istambul universiteti rasman 1933 yilda universitet maqomini olgan bo‘lsada, uning tashkil topgan sanasi sifatida 30 may 1453 yil ko‘rsatiladi. Tarixchilarning maʼlumotiga ko‘ra, Fotih Sulton Mehmet Istambulni fath etgan kunning (29 may 1453 yil) ertasiga shaharda madrasalar faoliyatini yo‘lga qo‘yish hamda dunyoviy taʼlimni boshlash bo‘yicha farmon chiqargan. Bugungi kunda Istambul universiteti talabalari soni 80 ming nafarga yaqin bo‘lib, ularning 9 mingga yaqini xorijlik talabalardir. Ularga 5 ming nafarga yaqin professor-o‘qituvchilar dars berib, universitet xodimlari soni 7 ming nafardan ko‘proq. Universitet tarkibiga 22 ta fakultet, 16 ta institut, 61 ta ilmiy tadqiqot markazlari kiradi, taʼlim 12 ta kampusda olib boriladi. Masofadan o‘qitish kurslarida 56 ta dastur bo‘yicha 485 ming nafar tinlovchi ro‘yxatdan o‘tgan. Universitet Turkiyaning patentlar soni bo‘yicha eng yetakchi oliy taʼlim muassasasi bo‘lib, Times-2021 va QS-2021 reytinglarida 801-1000 guruhida, ARWU-2020 reytingida 401-500 guruhida o‘rin egallaydi. Universitetning mashhur bitiruvchilari orasida Turkiyaning o‘n birinchi prezidenti Abdullah Gul, Nobel mukofoti sovrindorlari Aziz Sanjar, Orxan Pamuk, ko‘plab bosh vazirlar, vazirlar, partiyalar rahbarlari, Isroilning ikkinchi prezidenti Itsak Ben-Zvi, Isroil birinchi bosh vaziri David Ben-Gurion kabi juda ko‘p mashhur shaxslarni sanab o‘tish mumkin.BuxDU Xalqaro hamkorlik bo'limi
