Ijtimoiy tarmoqlarda “Buxoro davlat universitetida o‘qituvchilar ommaviy ravishda mahalla fuqarolar yig‘inlariga biriktirilib, uzoq tumanlarga jo‘natilmoqda. O‘qituvchilar norozi” mazmunidagi xabarlar tarqalmoqda.Shuni ta’kidlash joizki, mamlakatimiz bo‘ylab o‘tkazilayotgan “Yangi O‘zbekiston – yangicha dunyoqarash” tadbirlarida ziyoli qatlamning ishtirok etishi islohotlarning mazmun-mohiyati va ahamiyatini keng jamoatchilikka yetkazish, aholining kayfiyatini ko‘tarish, mehr-oqibat, shukronalik, o‘zaro yordam kabi milliy va umuminsoniy qadriyatlarni yanada kuchaytirishda yuqori samara beradi.Xususan, Buxoro davlat universiteti professor-o‘qituvchilari ham ushbu tadbirlarda oliy ta’lim tizimidagi yangiliklar, qabul kvotalarining oshirilganligi, imtiyozli qabullar borasida yangiliklarni keng jamoatchilikka yetkazishmoqda, iqtidorli o‘quvchilar bilan uchrashib, ular bilan kasbga yo‘naltirishda erta tashxis ishlarini amalga oshirishmoqda, kitob va o‘quv jihozlarini sovg‘a qilishmoqda. Tadbirlar o‘tayotgan mahallalarda sog‘liqni saqlash va ta’lim tizimida kadrlarga bo‘lgan ehtiyojdan kelib chiqqan holda kelgusi o‘quv yili uchun maqsadli qabulni yo‘lga qo‘yish imkoniyatlari ko‘rib chiqilmoqda.O‘qituvchilar tadbirlarda ixtiyoriy ravishda ishtirok etishayotgan bo‘lib, oliy ta’lim tizimidagi yangiliklar, xususan chekka hududlarda yashovchi aholi vakillarini ham oliy ta’lim bilan qamrab olish ko‘lamlarini oshirish borasidagi imkoniyatlar haqida ma’lumot berishda faollik ko‘rsatayotgan professor-o‘qituvchilarni universitet byudjetdan tashqari mablag‘lari hisobidan moddiy rag‘batlantirilishi rektor buyrug‘ida ko‘rsatib o‘tilgan.Shu sababli, ijtimoiy tarmoqlardagi bunday noxolis xabarlardagi bir tomonlama yondashuv, mavzuning mazmunini chuqur anglab yetmasdan fikr bildirish ta’bni xira qiladi.Buxoro davlat universiteti jamoasi barcha sohada tubdan yangilanayotgan mamlakatimizdagi islohotlarga daxldorlik hissi bilan faoliyat olib borishda davom etadi.BuxDU Matbuot xizmati
