11.01.2022

18-20-noyabr kunlari Qozog‘iston poytaxti Nursulton shahrida xalqaro G-Global platformasi tomonidan tashkil etilgan “G-Global. XXI asr dunyosi” xalqaro onlayn kongressi bo‘lib o‘tdi. Kongress tadbirlari doirasida “Blokcheyn: “Bir kamar – bir yo‘l” loyihasini amalga oshirishning samarali yo‘li”, “Global ipak yo‘li – Shaharlar merlari forumi”, “Butunjahon inqirozga qarshi konferensiyasi”, “Universitetlar global kongressi” kabi xalqaro onlayn forumlar o‘tkazildi. Kongressda ko‘plab xalqaro qo‘mitalar rahbarlari, vazirlar, xalqaro banklar, tadqiqot markazlari, jamg‘armalar direktorlari, YUNESKO, Xalqaro valyuta fondi vakillari, Nobel mukofoti sovrindorlari, yetakchi olimlar, bir qancha mamlakatlar siyosatchilari, shu jumladan sobiq prezident va bosh vazirlar ishtirok etib, XXI asrda insoniyat oldida turgan masalalar va istiqbol haqida maʼruzalar o‘qishdi.Kongressning uchinchi kuni tadbirlari doirasida “Universitetlar global kongressi” onlayn shaklda o‘tkazildi. Kongress ishida jahonning turli burchaklaridan yuzlab universitetlar ishtirok etdi. Kongressning o‘tkazilishi BMT bosh kotibining yoshlar masalalari bo‘yicha vakili Djayatma Vikramanayakening tabrik so‘zi bilan ochildi.Kongressning plenar sessiyasida Niderlandiya, Braziliya, Hindiston, Janubiy Afrika Respublikasi, Filippin, Kolumbiya, Rossiya, Qozog‘iston va boshqa ko‘plab mamlakatlardan atoqli shaxslar so‘zga chiqib, XXI asrda universitetlarning jahon taraqqiyotidagi o‘rni qanday bo‘lishi lozimligi, kelajak avlodlarga yana-da yaxshiroq dunyo qoldirish uchun ilm-fanning ahamiyati haqida fikrlarini bildirdilar.Buyuk hind mutafakkiri va siyosatchisi Maxatma Gandining nevarasi, Gandi jamg‘armasi raisi Ela Gandi hamda janubiy afrikalik siyosatchi Nelson Mandelaning nevarasi, Mandela jamg‘armasi raisi Ndileka Mandela o‘zlarining mashhur ajdodlari XXI asr dunyosining tinch va osoyishta sharoitlarda yashashi, xalqlararo totuvlikning o‘rnatilishi, ijtimoiy muammolarning hal qilinishi aynan taʼlim orqali amalga oshirilishini har doim taʼkidlab kelganliklarini aytib o‘tdilar.Plenar sessiyada Buxoro davlat universiteti xalqaro hamkorlik bo‘yicha prorektori Abror Jo‘rayev ham so‘zga chiqdi. A.Jo‘rayev o‘z nutqida Markaziy Osiyo mamlakatlari, xususan O‘zbekiston zamini jahon sivilizatsiyasi uchun buyuk mutafakkirlarni yetishtirib berganligi, hududimiz jahon ilmi va madaniyatining markazi bo‘lganligi, aniq va tabiiy fanlar, adabiyot, tibbiyot rivojiga katta taʼsir ko‘rsatgan olimlar yashab o‘tganligi, diniy bag‘rikenglikning mukammal namunasi bo‘lganligini aytib o‘tdi. Birinchi Renessans VIII-XII asrlarda kuzatilgan bo‘lsa, ikkinchisi o‘rta asrlarga to‘g‘ri kelishini, ayni paytda esa O‘zbekistonda Prezident Sh.Mirziyoyevning tashabbusi va rahnamoligida “Uchinchi Renessans” uchun poydevor yaratilayotganligini taʼkidlandi. Buning uchun eng asosiy omil sifatida albatta ilm-fan va taʼlimni rivojlantirish tanlanganligi, ushbu yo‘nalishda mamlakatimizda tarixiy o‘zgarishlar amalga oshirilayotganligini aytib o‘tar ekan, A.Jo‘rayev kongressda ishtirok etayotgan olimlar, siyosatchilar va mashhur shaxslarni universitetlarda taʼlim bilan bir qatorda tarbiyaviy faoliyatni ham olib borishga chaqirdi, ushbu yo‘l bilan kelajak avlod uchun tinch, farovon va sog‘lom hayot sharoitlari yaratish mumkinligini taʼkidlab o‘tdi. Ushbu maʼruza kongress ishtirokchilarida katta qiziqish uyg‘otib, unda taklif qilingan masalalarning dolzarbligi alohida qayd etildi.Kongress natijalari bo‘yicha “Barqaror rivojlanish dasturi-2030 ni amalga oshirishda universitetlarning o‘rni to‘g‘risida Almati deklaratsiyasi” ishlab chiqildi.BuxDU Matbuot xizmati