11.01.2022

Oliy ta’lim tizimida olib borilayotgan islohotlar bugungi kunda ta’lim muassasalari oldiga xorijiy tajribani chuqur o‘rgangan holda yangicha yondashuv orqali ta’lim jarayonini tashkil etishni taqozo etmoqda. Buxoro davlat universiteti rahbariyati ham mazkur talabni chuqur anglagan holda so‘nggi yillarda ta’lim-tarbiya, ilmiy- innovasion faoliyatni yangi andozalar asosida olib bormoqda. Pedagog xodimlar oldiga qo‘yilayotgan asosiy talablardan biri esa ilmiy innovasion faoliyatni amaliyot bilan chambarchas bog‘lagan holda ta’lim-tarbiya jarayoniga tadbiq etishdan iboratdir. Shu maqsadda ilmiy-innovatsiya ishlari bo‘limi tomonidan AQSh, Kanada, Buyuk Britaniya, Yaponiya, Janubiy Koreya, Rossiya kabi dunyoning yuqori reytinglarida turuvchi xorijning yetakchi oliy ta’lim muassasalari professor-o‘qituvchilarini taklif qilgan holda qator ilmiy-nazariy va ilmiy-amaliy anjumanlar o‘tkazilmoqda, talabalar uchun ma’ruzalar tashkil etilmoqda.Shu yilning 30 oktabr kuni universitetning Xorijiy tillar fakulteti Ingliz tilshunosligi kafedrasi shu kafedraning faxriy o‘qituvchisi Muhabbat Abdullayeva tavalludining 80 yilligiga bag‘ishlangan «Tilshunos olima Muhabbat Abdullayeva - fonetika va fonologiya ilmining yetuk mutaxassisi» mavzusidagi ilmiy-amaliy anjumanni tashkil etdi. M.Abdullayeva 40 yildan ortiq umrini yoshlarga ilm-fan o‘rgatib ularni dunyoning nufuzli dargohlarida faoliyat yuritishiga o‘z hissasini qo‘shdi. Uning muallifligida qator ilmiy maqolalar, xalqaro tezislar, o‘quv-metodik qo‘llanmalar chop etildi.Konferensiyani universitetning xalqaro hamkorlik bo‘yicha prorektori, iqtisod fanlari nomzodi A.Jo‘rayev kirish so‘zi bilan ochib, universitetda ilmiy-innovatsiya ishlari bo‘yicha yosh olimlarga yaratib berilayotgan imkoniyatlar haqida gapirdi. Tadbir ishtirokchilariga M.Abdullayeva faoliyatining o‘ziga xos qirralari xususida so‘zlab berdi.Konferensiya ishida universitetimiz olimlari, ilmiy tadqiqotchilari, magistrantlari qatorida respublikamizning bir qancha ko‘zga ko‘ringan oliy ta’lim muassasalari professor-o‘qituvchilari, ustozning hamkasb shogirdlari ishtirok etdi. Mazkur anjumanning ahamiyatli tomoni shundaki, unda M.Abdullayevaning bugungi kunda chet elda faoliyat yuritayotgan izdoshlari, jumladan AQShning Atlanta universiteti professori Z.Akobirova, Kanadaning Vankuver universiteti professori D.Xasanova, AQShning Stanford universiteti til buyicha konsultanti N.Bozorovalar ishtirok etib ustoz M.Abdullayeva haqida iliq xotiralarini hamda o‘z ilmiy tadqiqotlari natijalari, xorijda ilmiy faoliyatning o‘ziga xos jihatlari haqida ma’ruzalar qildilar.Anjuman ishida BuxDU professori M.Baqoyeva, universitet faxriysi, professor S.Saidov, Nizomiy nomidagi TDPU dotsenti M.Alimova, AQSh elchixonasi Ingliz tili dasturlari koordinatori F.Akobirov, O‘zDJIDU doktoranti N.Voxidova, kafedra faxriy o‘qituvchisi B.Bobomurodova, NavDPI Ingliz tili va adabiyoti kafedrasi mudiri S.Xasanova, BuxDU Ingliz tilshunosligi kafedrasi o‘qituvchisi F.Vaxidovalar so‘zga chiqib M.Abdullayeva qoldirgan ma’naviy meros, kasbga va fanga bo‘lgan fidoyilik fazilatlari haqida to‘xtalib o‘z ilmiy ma’ruzalarining mazmun mohiyati haqida gapirdilar.Tadbirning yalpi majlisi zoom dasturi orqali onlayn tarzda o‘tkazildi. Qisqa tanafussdan keyin konferensiya o‘z ishini sho‘balarga bo‘lingan holda masofaviy davom ettirdi. Tadbir so‘ngida ishtirokchilar anjumanning ilmiy-amaliy ahamiyati oliy ta’lim tizimini xorijiy tajribalar asosida tashkil etish nuqtai nazaridan muhim ekanligini ta’kidlashdi.BuxDU Matbuot xizmati