11.01.2022

Assalomu alaykum hurmatli ustozlar, aziz talabalar, universitetimiz jamoasi!Sizlarni xalqimizning eng ulug‘, eng aziz bayrami – mamlakatimiz mustaqilligining 29 yillik bayrami hamda yangi 2020/2021 o‘quv yili bilan chin qalbimdan samimiy tabriklayman!Sizlarga ushbu qo‘shaloq bayramlar munosabati bilan tinchlik-omonlik, baxtu saodat, xonadonlaringizga fayzu baraka, yosh avlodga ta’lim va tarbiya berishdek sharafli ishlaringizga muvaffaqiyatlar tilayman!Biz sizlar bilan nafaqat jonajon O‘zbekistonimizning eng qadimiy va go‘zal shaharlaridan biri, balki har doim butun musulmon olamini o‘ziga talpintiradigan, ilmi, ma’rifati bilan elini sharaflarga burkagan, bashariyat tamadduni rivojiga beqiyos hissa qo‘shgan ko‘plab ulug‘larga beshik bo‘lgan muqaddas zamin – Buxoroi Sharifda yashash va ishlash sharafiga muyassar bo‘lgan ziyoli insonlarmiz.Ta’lim va tarbiya mamlakat taraqqiyoti va uning kelajagi kafolati ekani isbot talab qilmaydigan haqiqat. Biroq bugungi kunda biz zimmamizga ta’lim va tarbiya sifatini o‘zgacha sharoitlarda ta’minlab berish majburiyatini olganmiz. Butun dunyoni larzaga solib turgan koronavirus pandemiyasi ta’lim sohasini, jumladan universitetimizni ham chetlab o‘tgani yo‘q. Mamlakatimizda koronavirus pandemiyasi tarqalishi oldini olish maqsadida joriy etilgan karantin sharoitida ta’lim muassasalari, jumladan, universitetimiz ham vaqtincha masofaviy shaklga o‘tgan bo‘lsa-da, talabalar uchun ta’lim jarayoni to‘xtamadi. Darslar Moodle platformasi, ijtimoiy tarmoqlar orqali masofaviy tarzda olib borildi. Shu munosabat bilan masofaviy ta’limni tashkil qilishda fidokorona mehnat qilayotgan professor-o‘qituvchilarimizga, rahbar xodimlarimizga, shunday murakkab davrda ham ilm-sirlarini egallash uchun barcha imkoniyatlarini ishga solayotgan talabalarimizga o‘z rahmatimni aytmoqchiman.Ma’lumki, mamlakatimizda yoshlarni oliy ta’limga qamrovini oshirib borish, zamonaviy va raqobatbardosh kadrlar tayyorlash borasida izchil siyosat olib borilmoqda. Shu munosabat bilan universitetimiz uchun ajratilgan qabul kvotalari ham yil sayin oshib bormoqda. 2020/2021 o‘quv yilida Buxoro davlat universitetiga 64 ta ta’lim yo‘nalishi bo‘yicha 38388 nafar yoki o‘tgan yilga nisbatan 12000 taga (31 foiz) ko‘p abiturient hujjat topshirdi. Tahlillarga ko‘ra, bitta o‘ringa o‘rtacha 8 nafar abiturient to‘g‘ri keladi. Magistraturaga 31 ta mutaxassislik bo‘yicha 2231 nafar yoki o‘tgan yildagiga nisbatan 1600 nafar ko‘p  abiturient hujjat topshirdi.Uiversitetimizga qabul kvotalari asosida joriy yilda bakalavriat yo‘nalishlari bo‘yicha 5150 nafar talabani qabul qilish rejalashtirilmoqda. Magistraturaga qabul parametrlari esa 192 ta  etib belgilangan. Umuman olgadigan bo‘lsak universitetga 2016 yildagiga qaraganda 4 baravar ko‘p talaba qabul qilmoqdamiz.Qadrli jamoa! 2020/2021 o‘quv yilida universitet talabalarining umumiy kontingenti 19 080 (bakalavriat – 18574 nafar, magistratura – 506 nafar) nafarni tashkil etishi (qo‘shimcha qabul, 5 yillik mehnat staji, 2-mutaxassislikdan tashqari) kutilmoqda. Jumladan, bakalavriat ta’lim yo‘nalishlari bo‘yicha Kunduzgi shaklda – 13 376 nafar, Sirtqi shaklda – 3066 nafar, Maxsus sirtqi shaklda – 795 nafar, Kechki shaklda – 458 nafar, 2-mutaxassislik Sirtqi shaklda – 528 nafar, xorijiy OTMlar bilan qo‘shma ta’lim dasturlari bakalavriat ta’lim yo‘nalishlari bo‘yicha - 351 nafar, magistratura mutaxassisliklari bo‘yicha – 439 nafar, xorijiy OTMlar bilan qo‘shma ta’lim dasturlari magistratura mutaxassislari bo‘yicha – 67 nafarga etkazish belgilangan.  Mazkur o‘quv yilida universitet kunduzgi bo‘limida jami 73 ta bakalavriat ta’lim yo‘nalishi bo‘yicha talabalar tahsil oladi.Professor-o‘qituvchilarga dars taqsimotini adolatli va shaffof tarzda amalga oshirish uchun qator tadbirlar amalga oshirildi. Jumladan, professor-o‘qituvchilar uchun yangi o‘quv yiliga tayyorgarlik ko‘rish yo‘nalishlarida bir qator vebinarlar va seminar-treninglar tashkil etildi. Kafedralar taqsimotlari asosida professor-o‘qituvchilarimiz taqsimlangan fanlar bo‘yicha MOODLE masofaviy ta’lim platformasiga o‘quv-nazorat materiallarini joylashtirdilar. 2020/2021 o‘quv yilida kafedralarda o‘quv jarayoniga jalb etiladigan 20 nafar xorijiy professor-o‘qituvchilar, olimlar va mutaxassislar ro‘yxati shakllantirildi.Masofaviy ta’lim talabalaridan kelib chiqib, yangi o‘quv yilidan har fanning o‘quv resurslari “Namunaviy onlayn kurs kompleksi” sifatida joriy etiladi. Uning tarkibiga videoma’ruza, elektron qo‘llanma (darslik), taqdimot materiallari, test topshiriqlari, keyslar to‘plami, nazorat savollari hamda boshqa o‘quv materiallari kiradi.2020/2021 o‘quv yilida kuzgi semestrda ta’lim jarayonini masofaviy shaklda boshlash uchun http://nmoodle.buxdu.uz/ bakalavriat ta’lim yo‘nalishlari bo‘yicha 1216 ta va magistratura mutaxassisliklari bo‘yicha 96 ta fandan masofali kurslar yaratildi.O‘tgan o‘quv yilidagi tajribamiz, yuzaga kelgan muammolar asosida masofaviy ta’limni yangi sifat darajasiga chiqarish uchun uning texnik va dasturiy ta’minotiga alohida e’tibor bermoqdamiz. Masofali ta’limning dasturiy ta’minoti (Moodle platforma) qayta ko‘rib chiqildi. BuxDU ichki lokalь tarmog‘ida va serverlarida yuzaga kelish ehtimoli bilan bog‘liq muammolar o‘rganib chiqilib, ularni bartaraf qilish choralari ko‘rildi. Yangi o‘quv yilida universitetga 5 ta yangi serverlarni olib kelib, ularni o‘rnatish bo‘yicha ishlarni olib bormoqdamiz. Ta’lim muassasamizda hozirgacha internet tezligi 400 Mb/s ni tashkil qilgan bo‘lsa, yangi tarif rejalariga o‘tishimiz orqali ushbu ko‘rsatkichni 1 Gb/s ga etkazish ko‘zda tutilgan.Yangi o‘quv yilida o‘qitiladigan fanlar bo‘yicha o‘quv adabiyotlari bilan ta’minlanganlik darajasi o‘rganilib, zarur o‘quv-uslubiy adabiyotlarni xarid qilish bo‘yicha takliflar shakllantildi. Yangi avlod o‘quv adabiyotlarini xarid qilish bo‘yicha 35 ta OTM muassasasiga 209 nomdagi darslik va o‘quv qo‘llanmalarni xarid qilish bo‘yicha buyurtmalar berildi. ARMning elib.buxdu.uz saytida jami 622454 ta elektron adabiyotlar joylashtirilgan. Shulardan, darsliklar 122363 tani, o‘quv-qo‘llanma 125381 tani, badiiy adabiyot 132445 tani, uslubiy qo‘llanma 116052 tani, ilmiy adabiyotlar 126211 tani, audio kitoblar 2205 tani tashkil etadi. Xorijiy tilda yaratilgan adabiyotlardan talabalarning foydalanish imkoniyatini oshirish zarur.Kafedralar tomonidan yaratiladigan videodarslar ekspertizadan o‘tkazilib, https://youtube.com/buxduuzedu videoportaliga joylash-tirilmoqda. Videoma’ruzalarni universitet ichki axborot muhiti va global videoxostinglarga joylashtirilishi bo‘yicha ta’lim yo‘nalishlari va mutaxassisliklar, kurslar, har bir fan kesimida muntazam monitoring yuritilmoqda.Yaqinda biz faoliyat ko‘rsatayotgan universitet tashkil topganiga 90 yil to‘ladi. Biroq olimlarimiz bu muazzam zaminda ajdodlarimiz bundan bir necha asrlar avval oliy madrasalarda tahsil olib, hozirgi zamonaviy ilm-fanning ilk poydevorini qo‘ygan va rivojlantirganliklari to‘g‘risida ilmiy va ashyoviy dalillar to‘plash orqali Buxoro universitetining tarix ildizlari Ibn Sinolar davridan ham ancha olis moziyga borib taqalishini isbotlashdek muqaddas, savobli ishga qo‘l urganlar. Bu gaplarni aytayotganligim sababi biz qilayotgan ishimiz, ilmimiz bilan ajdodlarimizga, O‘zbekiston, Buxoro farzandi degan nomga munosib bo‘lishimiz kerak.So‘nggi yillarda mamlakatimiz har tomonlama rivojlanib, ravnaq topib borayotganligi hech kimga sir emas. Ayniqsa, muhtaram Prezidentimizning ta’lim sohasini tubdan isloh qilish bo‘yicha tashabbuslari, rahnamoliklari diqqatga sazovordir. Davlatimiz rahbari, hukumatimiz tomonidan ta’limga, ayniqsa oliy ta’limga berilayotgan e’tibor barchamizni ruhlantirish bilan birgalikda zimmamizga yuksak mas’uliyat yuklaydi.Kadrli  universitetimiz jamoasi!Mintaqamiz, viloyatimizning eng yirik, eng nufuzli oliy ta’lim muassasasi – Buxoro davlat universitetida yangi o‘quv yili davomida hamjihat bo‘lib, birgalikda og‘ishmay amalga oshirishimiz lozim bo‘lgan quyidagi ishlar yuzasidan Sizlarga murojaat qilmoqchiman:Aziz ustozlar, hamksblar! Muhtaram Prezidentimiz eslatganlaridek, Mahmudxo‘ja Behbudiyning “Dunyo imoratlari ichida eng ulug‘i maktabdir” degan fikrining mazmun va mohiyatiga yana bir bor ahamiyat beraylik! Zero, universitet ham ulug‘ maktabdir, unda tom ma’nodagi ulug‘ va buyuk insonlar ishlashi kerak.Biz kuchli jamoamiz. Hammamiz ulug‘ maqsadlarimiz yo‘lida birlashsak, birgalikda mehnat qilsak, albatta ko‘zlangan maqsadlarga erishamiz!Sizlarni yana bir bor mustaqillik bayrami va yangi o‘quv yili bilan tabriklayman! Barchangizning yangi o‘quv yilida g‘ayrat va shijoat bilan qiladigan mehnatlaringiz unumli va samarali bo‘lishini tilayman!Buxoroning aziz avliyolari, piru-ustozlari ruhi xayrli ishlarimizda barchamizga yor bo‘lsin!Hamisha sog‘ va salomat bo‘ling!