11.01.2022

Til bu nafaqat o‘zaro muomala yoki aloqa vositasi, balkim tafakkur oynasi demakdir. Har bir xalq, millat yoinki jamiyat uchun o‘z ona tili bebaho qadriyat, millat g‘ururi hamda faxr tuyg’usini tuyishga zamin yaratguvchi xazina. Til millatning ongi va xotirasi, ruhiyati, ma’naviy-madaniy qiyofasi, milliy qadriyatlari, o‘tmishi, tashqi olamga munosabatining in’ikosi hamdir. Tilning millat, davlat, jamiyat taraqqiyotidagi o‘rni juda muhim, o‘ta zaruriy va dolzarb. Zero, bu tushunchalar o‘zaro dialektik bog‘liq va aloqador. Millat, davlat, jamiyat taraqqiy qilar ekan, uning ona tiliga bo‘lgan e’tibori va mehri kuchaya boradi. Ijtimoiy hayotdagi taraqqiyot tildagi taraqqiyotni belgilab beradi.Har bir millat ona tilining tamadduni ijtimoiy hayoti, turmush tarzi va dunyoqarashiga bog‘liq kechadi. O‘zbek tili o‘zining rivojlanish tarixida bir qancha bosqichlarni bosib o‘tdi. Ajdodlarimizning ulkan aqliy salohiyati bilan yo’g’rilgan asarlar, ularda jo bo’lgan purhikmat fikrlar, ta’limiy-tarbiyaviy qarashlar bugungi kunda ham o‘z ahamiyatini yo‘qotgan emas. Zamon shiddat bilan o‘zgarmoqda. Hayotimizga har kuni ko‘plab yangiliklar kirib kelmoqda. Turmush tarzimiz, dunyoqarashimiz, fikrlashimiz, yurish-turishimiz, kiyinishimiz, muomala-munosabatlarimizda zamonga moslashish, unga hamnafaslikda yashash yaqqol ko‘zga tashlanmoqda. Har bir sohada evrilish, tub islohotlar jarayoni jadal kechmoqda. Kasb-korlar, mutaxassisliklar takomillashmoqda.Bu jarayondan milliy qadriyatlarimizning boqiy timsoli sanalgan ona tilimiz ham chetda qolmayapti. Ona tili va uni o‘qitishda boshqalar havas qilsa arzigulik yutuqlarni qo‘lga kirityapmiz. Ko‘chalardagi yozuvlar, binolardagi peshlavhalar, Mustaqillik shiorlari bag‘rikeng va ulug‘ xalqimiz orzu qilgan ezgu maqsadlarning yorqin ifodasi sifatida ko‘zimizni yashnatib turibdi.Bugun yer yuzida 7000 ga yaqin til va lahja bo‘lsa, ulardan bor-yo‘g‘i 178 tasi davlat tili maqomiga ega. Ular orasida o‘zbek tili ham borligi bizning baxtimiz, faxrimizdir.So’zimiz yakunida dono xalqimizning bir hikmatini eslab o’tmoqchiman: “Ish bilganga bir tanga, til bilganga ming tanga”. Bir qarashda xorijiy tillarni o’rganishga da’vat deya tushunilayotgan ushbu jumlada, eng avvalambor o’z ona tilida aytilgan “sehrlovchi”, “shifobaxsh” so’zlarning muloqot quroli, yutuqlarimiz debochasi sifatida namoyon bo’lishini unutmasligimiz joiz.Odilshoh Bobokalonov,Xorijiy tillar fakulteti o’quv ishlari bo’yicha dekan muovini,Fransuz tili fani o’qituvchisi