15-oktyabr kuni Buxoro viloyat investitsiya va tashqi savdo boshqarmasida viloyat hokim o‘rinbosari R.Asadov boshchiligida Hindistonning mashhur Manipal universiteti vakillari bilan onlayn uchrashuv o‘tkazildi. Uchrashuvda Ozbekistonning Hindiston elchisi D.A.Xamidov, Buxoro davlat universiteti, Buxoro davlat tibbiyot instituti, Buxoro muhandislik-texnologiya instituti vakillari ham ishtirok etdi. BuxDU nomidan xalqaro hamkorlik bo‘yicha prorektor A.Jo‘rayev ishtirok etdi.Manipal kompaniyalar guruhi 1953 yilda tashkil qilingan bo‘lib, uning tarkibiga universitetlar, klinikalar va boshqa soha kompaniyalar kiradi. Manipal universiteti QS-2021 jahon akademik reytingida 751-800 o‘rinni egallab turibdi. Hindistondan tashqari mamlakatlarda 5 ta kampusga ega bo‘lgan Manipal universiteti meditsina sohasida Hindistonning eng yetakchi oliy taʼlim muassasasi hisoblanadi. Manipal kompaniyalar guruhida 23000 ga yaqin xodimlar faoliyat yuritishadi. Manipalda tahsil olayotgan talabalar soni 50000 dan ziyod. O‘zining 15 ta klinika tarmog‘i bilan Manipal guruhi Osiyoning sog‘liqni saqlash sohasidagi eng yirik guruhlari qatoriga kiradi. Microsoft, Nokia kabi mashhur kompaniyalarning ijrochi rahbarlari aynan Manipal universiteti bitiruvchilari hisoblanadi.Hokim o‘rinbosari R.Asadov Hindiston tomoniga Buxoro viloyatida oliy taʼlim sohasidagi imkoniyatlar haqida maʼlumot berib o‘tdi. Shu jumladan, Buxoro va qo‘shni Navoiy viloyatlari maktab bitiruvchilarining oliy taʼlim muassasalariga qabul qilinish ko‘rsatkichlari bo‘yicha respublikamiz miqyosida eng yuqori o‘rinlarda turishi, viloyatda aniq fanlarga o‘qitish sifati yuqori darajada ekanligi, xususan Qorako‘l maktabi tajribasi keng tarqalganligini aytib o‘tdi. Manipal universiteti bilan hamkorlikning barcha yo‘nalishlariga tayyorlik, buning uchun Buxoro viloyati hokimiyati tomonidan barcha shart-sharoitlar yaratilishi maʼlum qilindi.Prorektor A.Jo‘rayev universitet haqida asosiy maʼlumotlarni berib o‘tdi. Xalqaro hamkorlik borasida erishilgan natijalar taqdim etildi. Manipal universiteti rahbariyati bilan alohida uchrashuv belgilanib, o‘zaro amalga oshiriladigan ishlar bo‘yicha gaplashib olishga kelishildi.Universitetimizning xalqaro taʼlim makonidagi obro‘-eʼtiborini oshirish bo‘yicha ishlar davom ettirilmoqda.
