Ko‘plab yoshlar ustozi, Buxoro viloyati oliy ta'lim muassasalarida faoliyat yuritgan professor, tarix fanlari doktori Mamedqul Mustafoyev 82 yoshida vafot etdi.Mamedqul Mustafoyev-1938 yilda Qorako‘l tumanida tavallud topgan. 1960 yilda Alisher Navoiy nomidagi Samarqand davlat universitetining tarix fakultetini tamomlagan. Yosh isteʼdodli olim, tadqiqotchi sifatida u Samarqand hamda Buxoro davlat universitetlari aspiranturasida tahsilni davom ettirdi. Fan nomzodi ilmiy darajasini yoqlaganidan so‘ng esa Mamedqul Mustafoyevning taqdiri bevosita 1968 yildan boshlab Toshkent Politexnika institutining Buxoro filiali bilan bog‘landi.Ustoz nafaqat ilmiy faoliyati, balki jamoat ishlaridagi jonbozligi, maʼnaviyat va maʼrifat targ‘ibotchisi, ommaviy axborot vositalaridagi faolligi bilan ham tanilgan edi. Jumladan, Mamedquli Mustafoyev viloyatda “O‘zbek-Turkman” madaniy markazining ko‘p yillik rahbari sifatida millatlararo totuvlikni, ikki xalq o‘rtasidagi ahillik va birodarlikni mustahkamlashga katta hissa qo‘shdi. Ana shunday zahmatli mehnatlari va fidoyiligi uchun u “Do‘stlik” ordeni bilan taqdirlandi.Hayotini yoshlar taʼlim-tarbiyasiga bag‘ishlagan olimning bosib o‘tgan ilmiy faoliyati, qo‘lga kiritgan yutuqlariga havas qilish mumkin. Chunonchi, u 1978 yildan Buxoro oziq-ovqat va yengil sanoat texnologiyasi institutining tarix va siyosiy iqtisod kafedrasi mudiri, 1981 yildan tarix kafedrasi dotsenti, 2000 yildan mazkur fakultet professori darajasiga erishgan. Mohir pedagog, tarix fanining zukko bilimdoni umrining oxirigacha mazkur institutning ijtimoiy fanlar kafedrasida faoliyat yuritib, o‘nlab, yuzlab shogirdlar yetishtirdi. Mamlakatimiz tarixining ochilmagan sahifalarini tadqiq etishga bag‘ishlangan qator nomzodlik disertatsiyalariga rahbarlik qildi. O‘z o‘rnida bugun uning qo‘lidan yetishib chiqqan shogirdlari orasidan o‘ndan ortiq fan nomzodlari, falsafa doktorlarini eʼtirof etish mumkin.Qolaversa, uning Buxoro tumani “Rabotak” mahallasidagi serfarzand oilasiga ko‘plar havas bilan qaraydi. Buning sababi turmush o‘rtog‘i Zulfiya Sharipova bilan besh o‘g‘il, bir qizni oq yuvib, oq tarab voyaga yetkazgan Mamedqul Mustafoyev farzandlarining barchasini oliy maʼlumotli mutaxassislar sifatida el qatoriga qo‘shgan. Ular bugun xalq xo‘jaligining turli sohalarida muvaffaqiyatli faoliyat yuritib kelishmoqda. Tarix fanlari doktori, professor Mamedqul Mustafoyevning porloq xotirasi do‘stlari, yaqin birodarlari, oila aʼzolari qalbida mangu yashaydi.Mamedqul Mustafoyevning ahli ayollariga, farzandlariga Buxoro davlat universiteti jamoasi nomidan taʼziya izhor qilamiz.Metin iroda va cheksiz sabr tilaymiz!Inna lillahi va inna Ilayhi rojiʼun!
