2020-yil 12-may kuni Buxoro davlat universitetida «Matematika fani va taʼlimini rivojlantirish istiqbollari: muammolar va yechimlar» mavzusidagi navbatdagi on-line vebinar boʼlib oʼtdi. Vebinarda hozirgi vaqtda davlatimiz rahbariyati tomonidan mamlakatimizda istiqbolli yoshlarni qoʼllab-quvvatlash, ularning iqtidorini roʼyobga chiqarish, ilmiy-tadqiqot va innovatsion faoliyatini samarali yoʼlga qoʼyish uchun qoʼshimcha shart-sharoitlar yaratish borasida amalga ishirib kelinayotgan izchil chora-tadbirlar haqida mutaxassislarning fikr va mulohazalari eshitildi.Oʼzbekiston Respublikasi Prezidentining 2019-yil 9-iyuldagi PQ-4387-sonli Qarori - “Matematika taʼlimi va fanlarini yanada rivojlantirishni davlat tomonidan qoʼllab-quvvatlash, shuningdek, Oʼzbekiston Respublikasi Fanlar Аkademiyasining V.I.Romanovskiy nomidagi Matematika instituti faoliyatini tubdan takomillashtirish chora-tadbirlari toʼgʼrisida” va ushbu qarorlarning 3-ilovasiga muvofiq har bir tumanda (shaharda) matematika fanini chuqurlashtirib oʼqitishga ixtisoslashtirilgan maktablar hamda Qoraqalpogʼiston Respublikasi, Buxoro, Namangan, Samarqand va Xorazm viloyatlarida Oʼzbekiston Fanlar akademiyasining V.I. Romanovskiy nomidagi Matematika instituti hududiy boʼlinmalari tashkil etilishini alohida taʼkidlash lozim. Mazkur on-line vebinarda Oʼzbekiston Respublikasi Fanlar akademiyasi, Oʼzbekiston Respublikasi Oliy va oʼrta maxsus taʼlim vazirligi, Oʼzbekiston Respublikasi Innovatsion Rivojlanish vazirligi jamoasi, Malayziya texnologiya universiteti, Polshaning Аdam Miskevich universiteti, Germaniyaning Ulm va Ruhr Boxum universitetlari, Shveytsariyaning Bern universiteti, Аvstriyaning Vena universitetida faoliyat olib borayotgan matematik hamyurtlarimiz, Oʼzbekiston Milliy Universiteti, Samarkand davlat universiteti, Buxoro davlat tibbiyot instituti, Buxoro davlat universiteti va uning qoshidagi Qorakoʼl akademik litseyida faoliyat olib borayotgan professor oʼqituvchilar, Buxoro davlat universiteti tayanch doktorantlari, magistrlari, iqtidorli talabalari hamda turli yillarda Matematika taʼlim yoʼnalishida tahsil olgan Davlat stipendiantlari ishtirok etdilar.Vebinar jarayonida Matematika ilm-fani va taʼlimini rivojlantirish boʼyicha bir qator taklif va tavsiyalar ishlab chiqildi. Xususan, ilmiy-tadqiqotlarini amaliyotga joriy qilish, ilmiy-tadqiqot ishlari bajarish layoqatiga ega iqtidorli talabalarni aniqlab, ularni ingliz tilini mukammal oʼrganishlari uchun shart-sharoitlar yaratish, xalqaro olimpiada gʼoliblari uchun maxsus kurslar tashkil qilib, ularga ilmiy rahbar biriktirish hisobiga ilmiy-tadqiqot ishlariga jalb qilish, yosh tadqiqotchilarning doktorlik dissertatsiyalarini muddatida himoya qilish kabi masalalariga alohida eʼtibor berildi. Xorijiy taʼlim muassasalarida faoliyat olib borayotgan olimlar bilan hamkorlikda bajariladigan ilmiy-tadqiqotlariga alohida eʼtibor qaratish lozimligi qayd qilib oʼtildi.Yosh olimlar uchun “Scopus va Web of Science xalqaro maʼlumotlar bazalariga kiritilgan jurnallarda ilmiy maqolalar nashr qilish malakasini shakllantirish”, “ilmiy maqolalarga beriladigan havolalar (iqtibosliklar) sonini oshirish metodikasi”, “olimning xalqaro reytingini belgilovchi Xirsh indeksni oshirish metodikasi”, “xalqaro loyihalarda ishtirok etish koʼnikmasini shakllantirish”, “LaTex dasturidan foydalanish imkoniyatlari” kabi dolzarb mavzularda mutaxassislar tomonidan ZOOM dasturi orqali onlayn kurslar tashkil etish boʼyicha takliflar berildi.Buxoro davlat universiteti Matbuot xizmati
