O`zbekiston-Turkmaniston, mazkur ikki jumlada necha ming yillik qardoshlik va mushtarak tarixiy aloqalar mujassam. Necha asrlik boy tarix va madaniyatga ega bo`lgan turkman xalqi bugungi kunda ham mamlakatimizning ravnaqiga o`z hissasini qo`shib kelmoqda. Bugungi kunda universitetimizda 311 nafar turkmanistonlik talabalarining tahsil olishi fikrimizning ayni dalili hisoblanadi. Turkmanistonlik yoshlarning iqtidori va faolliklari tufayli bugungi tadbirlarimizda fayz va o`zgacha shukuh kasb etilmoqda. Bugun ham Buxoro davlat universiteti talabalar turar joyida Tarix va madaniy meros fakultetida tahsil oluvchi bir guruh turkmanistonlik talabalar tomonidan turkman milliy taomlari ko`rgazmasi bo`lib o`tdi. Talabalar o`zlari pishirgan bahoriy taomlarning har biri haqida kecha ishtirokchilariga ma`lumot berib o`tdilar. Kechada Tarix va madaniy meros fakulteti dekani J. Jo`rayev, ma`naviy-ma`rifiy ishlar bo`yicha dekan muovini A. Boltayev, universitet ma`naviyat bo`limidan S. Muxlisov, Jahon tarixi kafedrasi mudiri O. Rashidov, fakultet professor-o`qituvchilari M. Qurbonova, A. Qayumova, M. Yusupova, K. Rahmonov va talabalar ishtirok etdilar. Dastavval, fakultet dekani J. Jo`rayev barcha xotin-qizlarni yaqinlashib kelayotgan bayramlar bilan tabriklab, ikki qardosh xalqning o`tmishi va buguni mushtarak hamkorlik asosida qurilgani xususida gapirdi. Turkmanistonlik talabalar tomonidan tayyorlangan kuy esa barchaga shodiyona kayfiyat baxsh etdi. Ta`kidlash joizki, bu kabi madaniy almashuvlar ikki xalqning madaniyatining boyishiga va rivoj topishiga xizmat qila oladi.
