2020 yilning yurtboshimiz tomonidan “Ilm maʼrifat va raqamli iqtisodiyotni rivojlantirish yili sifatida” eʼtirof etilishi bu boradagi ishlarga qanot berdi, desak mubolagʼa boʼlmaydi. Qadimdan ilm-maʼrifat oʼchogʼi boʼlgan Buxoro shahrida joriy yilning 1 fevral kuni Oʼzbekiston Respublikasi Innovatsion rivojlanish vazirligining tashabbusi bilan respublika tarixida ilk marotaba Buxoro davlat universitetida “Buxoro viloyatini innovatsion rivojlantirish: muammo va yechimlar” mavzusida hududning ilmiy va innovatsion salohiyatini rivojlantirishga qaratilgan respublika miqyosida ilmiy-amaliy anjuman boʼlib oʼtdi. Аnjumanda Oʼzbekiston Respublikasi Innovatsion rivojlanish vaziri oʼrinbosari O.Toʼychiev, Buxoro viloyati Turizmni rivojlantirish departamenti bo'lim boshlig'i Sh. Sharofiddinov, Buxoro shahar hokimi o'rinbosari K.Davronov hamda respublikamizning barcha oliy taʼlim muassasalaridan ilmiy ishlar va innovatsiyalar boʼyicha prorektorlari, ilmiy tashkilotlarning ilm-fan boʼyicha direktor oʼrinbosarlari hamda respublika OTMlaridan 130 dan ortiq professor-o'qituvchilar ishtirok etishdi. Anjumanni BuxDU Ilmiy ishlar va innovatsiyalar bo'yicha prorektori O.S. Qahhorov kirish so'zi bilan ochib, bugungi kunda respublikamizning barcha hududlarida ilm-fan va texnika yutuqlarini keng qo'llagan holda iqtisodiy tarmoqlariga, ijtimoiy va boshqa sohalarga zamonaviy innovatsion texnologiyalarni joriy etish mamlakatimiz rivojlanishida muhim o'rin kasb etadi deya ta'kidlab o'tdi. Taqdim etilayotgan ilmiy-nazariy yechim, aniq tavsiyalar qizgʼin muhokama etildi.So'z navbati Toshkent davlat pedagogika universiteti ilmiy ishlar va innovatsiyalar bo'yicha prorektori B.S. Abdullayeva, TerDU ilmiy ishlar va innovatsiyalar bo'yicha prorektori A.U. Sattorov, BuxDU professori Sh.A. Xaitov, Qarshi muhandislik iqtisodiyot instituti ilmiy ishlar va innovatsiyalar bo'yicha prorektori Z.L. Botirov, Samarqand Ipak yo'li turizmi xalqaro universiteti ilmiy ishlar va innovatsiyalar bo'yicha prorektori M.T. Alimovalarga berildi. Oliy taʼlim muassasalaridan ilmiy ishlar va innovatsiyalar boʼyicha prorektorlari, ilmiy tashkilotlarning ilm-fan boʼyicha direktor oʼrinbosarlari anjuman davomida oʼzaro tajriba almashildi. Shuningdek, oliy taʼlim muassasalarining magistr talabalari va doktorantlarni ilmiy tashkilotlarga qisqa muddatli stajirovkalarga yuborishga kelishib olindi. Innovatsion rivojlanish vaziri oʼrinbosari O.Toʼychiev tomonidan anjumanni yuqori saviyada tashkil etishda amaliy yordam koʼrsatganligi uchun Buxoro davlat universiteti rektori O.Xamidov va prorektor O.Qahhorovga Innovatsion rivojlanish vazirligining minnatdorchiliklari topshirildi.Shuningdek, anjuman yakuniy natijalariga koʼra, hududning soha mutaxassislari, oliy taʼlim muassasalarining professor-oʼqituvchilari tomonidan ilmiy faoliyatga oid davlat dasturlari doirasida tanlovga eʼlon qilish maqsadida 12 ta dolzarb mavzular tanlab olindi.Albatta, iqtisodiyotimizning ravnaq topishi ilm-fan va innovatsiyalar bilan bog'liq. Buning uchun o'z o'rnida innovatsion g'oyalar, loyihalar va ishlanmalarga keng yo'l ochilishi kerak. Bugungi anjuman ham ko'pgina hamkorlarimiz, ishtirokchilarimiz uchun yangi innovatsion g'oyalarni qo'llashda turtki bo'lishiga aminmiz. Buxoro davlat universiteti Matbuot kotibi Otabek Jalolov
