BuxDU Xorijiy tillar fakulteti xorijiy til va adabiyot yo‘nalishi 4-kurs (6-2chi-16 guruh) talabalari Buxoro shahridagi 23-o‘rta maktabda pedagogik amaliyot davrida maktabning 4-sinf o‘quvchilari bilan "Our teachers" mavzusida tadbir o‘tkazishdi. Tadbirda o‘qituvchilik kasbining mashaqqatlari va O‘zbekistonda ta‘lim tizimida olib borilayotgan o‘zgarishlar haqida talabalar ma‘lumot berishdi, ustozlar madhini kuylovchi she‘r va qo‘shiqlar jajji bolajonlar tomonidan o‘zga tilda ijro etildi.Bolalarning ingliz tilini o‘rganishga bo‘lgan ishtiyoqi, chet tilda ravon so‘zlasha olishi, she‘r va qo‘shiqlarni maromida ijro etishlarida amaliyotchi talabalarning ham xissalari mavjud ekanligi kishini quvontiradi. Tadbirda BuxDU Ingliz adabiyoti kafedrasi katta o‘qituvchisi Ahmedova M. B. so‘zga chiqib, talabalar o‘qish davrida olgan bilimlarini amalda qo‘llayotganlari yutuq ekanligini ta‘kidladi. BuxDU jamoasining maktablar va boshqa o‘quv yurtlari bilan hamkorligi davom etadi.