Oʼzbekiston Respublikasi Prezidenti Аdminstratsiyasining 2019 yil 11 oktabrdagi topshirigʼi ijrosini taʼminlash yuzasidan maktablarga metodik yordam berish hamda oʼquv-tarbiya jarayonlarining sifatini oshirish maqsadida Respublika miqiyosida oliy taʼlim muassasalari umumtaʼlim muassasalariga biriktirilib, “Maktab-oliy oʼquv yurti” hamkorligi yaxshi yoʼlga qoʼyildi. Bundan koʼzlangan asosiy maqsad, umumtaʼlim maktablari faoliyatini takomillashtirish, oʼqituvchilarning kasbiy va pedagogik mahoratini, oʼquvchilarning ilm-fan va kasb-hunarga qiziqishini oshirish, oliy taʼlim muassasalari va umumtaʼlim maktablari oʼrtasidagi oʼzaro hamkorlik aloqalarini mustahkamlashdir. Shu munosabat bilan Buxoro davlat universiteti Matematika kafedrasi professor-oʼqituvchilari tomonidan viloyat hududidagi maktablarga amaliy va uslubiy yordam koʼrsatish hamda oʼzaro hamkorlik boʼyicha bir qator ishlarni amalga oshirmoqdalar. Natijada nafaqat oʼquvchi yoshlar, balki oʼqituvchilarning ham kasbiy mahorati ortib, taʼlim sifati ortib bormoqda. 2019 yil 9 noyabr kuni Matematika kafedrasiga biriktirilgan Qorovulbozor tuman 7-umumtaʼlim maktabida T.H.Rasulov, А.Sh.Rashidov, E.B.Dilmurodov, H.H.Turdiev, H.Parmonovlar Qorovulbozor tumanidagi 8 ta maktabdan tashrif buyurgan oʼquvchilarga va ularning ustozlariga mahorat darslari (master-klass) oʼtishdi. Iqtidorli oʼquvchilar orasidan oʼqituvchilikka qobiliyati bor, pedagoglik kasbini tanlash istagini bildirganlar bilan alohida suhbat oʼtkazildi. Suhbat davomida matematika fanining nozik qirralari haqida qatnashchilarga maʼlumot berish bilan bir qatorda ularni qiziqtirgan savollarga ham atroflicha javob berildi. Qorovulbozor tumani Xalq taʼlimi boʼlimi TSM inspektor metodisti Tursunova Dilfuza Jamshidovnaning tashabbusi bilan tumandagi maktablarda faoliyat yuritayotgan matematika fani oʼqituvchilari bilan davra suhbati oʼtkazildi. Unda asosan matematika fanini oʼqitishda qoʼllaniladigan interfaol usullar, nisbatan murakkab mavzularni oʼqitish metodikasi, toʼgaraklarda oʼquvchilarni Xalqaro va Respublika fan olimpiadalariga tayyorlashda eʼtibor qaratilishi lozim boʼlgan jihatlari haqida soʼz yuritildi. Matematikadan oʼquv mashgʼulotlarini samarali tashkil etishda xorijiy texnologiyalarning tutgan oʼrniga alohida eʼtibor qaratildi. Bundan tashqari, mazkur maktabdagi pedagoglarga boʼlgan ehtiyoj, taʼlim sifati va moddiy-texnik bazasi oʼrganib chiqildi. Buxoro davlat universiteti professor-oʼqituvchilari jamoasi tuman XTB xodimlari S.N.Umarov va D.J.Tursunovalar hamrohligida maktab hayoti bilan tanishish maqsadida sayohat uyushtirdilar. 2019 yil 19 martdagi Oʼzbekiston Respublikasi Prezidenti Sh.M.Mirziyoev rahbarligida oʼtkazilgan 12-son videoselektor bayonnomasining ijrosi hamda 5 ta muhim tashabbus doirasida olib borilayotgan ishlar koʼlami bilan tanishdilar. Jumladan, maktabning “Raketa-model” toʼgarak xonasiga tashrif buyurib, oʼquvchi-yoshlar tomonidan roboto-texnika vositalar maketini va tayyorlangan rakutalar modellarini koʼzdan kechirdilar. Maktab muzeyi rahbari S.Boboev undagi maktab tarixi bilan bogʼliq ekponantlar haqida batafsil maʼlumot berdi. Maktabda faoliyat yuritayotgan fan toʼgaraklariga alohida eʼtibor qaratildi. Fizika fani boʼyicha “Yosh fiziklar” toʼgarak rahbari I.Joʼraev tomonidan oʼquvchilarga fanning hozirgi yangiliklari va erishilayotgan yutuqlar toʼgʼrisida davra suhbati kuzatildi. Maktabda toʼliq internet tizimiga ulangan kompyuter sinfi mavjud boʼlib, undagi 16 ta kompyuter oʼquvchilar foydalanishlari uchun tayyorlab qoʼyilgan. Bundan tashqari, maktabdagi “Zakovat”, “Munozara”, “Yosh dasturchi”, “Qalamtasvir”, “Yoshlar teatr studiyasi”, “English conservation”, “Yosh qalamkashlar”, “Quvnoqlar va zukkolar” kabi toʼgaraklar faoliyati bilan tanishildi. Oʼzbekiston Yoshlar ittifoqi boshlangʼich tashkiloti yoshlar yetakchisi F.I.Sadullaeva maktabda tahsil oluvchi oʼquvchi yoshlarning turli yoʼnalishlarda erishgan yutuqlari haqida axborot berdi. Soʼnggi yillarda aksariyat oʼquvchilarning sport, sanʼat, teatr va ijodkorlik bilan bogʼliq sohalaridagi yutuqlari eʼtirof qilindi. Maktab oʼquvchilarining tuman, viloyat miqyosida sportning valeybol, shaxmat, shashka, basketbol turlari boʼyicha qoʼlga kiritilgan yutuqlari sanab oʼtildi. Аyniqsa, “Yosh qutqaruvchi - 2019” harbiy sport musobaqalarida viloyatda 1-oʼrinni olib, Respublika bosqichiga yoʼllanma olganligi eʼtiborga molikdir. Maktabdagi psixolog xonasiga tashrif “Qum terapiya” stoli bilan tanishish bilan boshlandi. Maktab psixologi L.Tosheva, H.Sultonovalar tomonidan oʼquvchilar va pedagogik jamoa oʼrtasida ruhiy sogʼlomlashtirish ishlari olib borilishi muntazam yoʼlga qoʼyilgan. Psixologlar tomonidan oʼquvchi yoshlarning psixologik holatini nazorat qilish maqsadida, “Yashash uchun 1001 sabab”, “Psixologik sogʼlom oilada sogʼlom bola”, “Men hayotdan zavqlanaman”, “Psixik salomatlikning 6 kaliti” mavzularida aktsiyalar oʼtkazilgan. Navbatdagi tashrif maktab kutubxonasiga boʼldi. Kutubxonada 7200 dan ortiq darsliklar, 3200 dan ortiq badiiy adabiyotlar mavjudligi eʼtiborni tortadi. Oʼquvchi yoshlarning kutubxonadan samarali foydalanishlarini keng targʼib qilish maqsadida “Men oʼqigan asar”, “Yosh kitobxon”, “Men sevgan shoir”, “Internetmi yo kitob” kabi mavzularda bahs munozaraga boy tadbir va tanlovlar tashkil etilganligini koʼrish mumkin. Mazkur hamkorlik oliy taʼlim muassasalari haqida oʼquvchilarga keng maʼlumot berish, muayyan sohaga qiziqishi yuqori yoshlarni OTMga jalb etish, oʼquvchilarning oʼz layoqati va qobiliyatiga nomunosib yoʼnalishlarda oʼqishining oldini olish, professor-oʼqituvchilarning oʼz ustida koʼproq ishlashiga xizmat qilishiga umid qilib qolamiz.
