Bugun yurtimiz rivojlanishning yuqori choʻqqilari sari dadil odimlab bormoqda. Jamiyatning har bir sohasida jahonning eng ilgʻor mamlakatlari safidan barqaror oʻrin egallash, tinch va farovon kelajak poydevorini mustahkamlash maqsadida jadal islohotlar kechmoqda, yangilanish-yuksalishlar davom etmoqda.Insonga ehtirom, vatanparvarlik gʻoyalari atrofida mujassamlashgan bu jarayonlarni keng aholi qatlamiga yetkazish, yoshlar ongiga singdirish, ijtimoiy faolligini oshirish, siyosiy-huquqiy ongini oʻstirish, maʼnaviy-maʼrifiy tafakkurini yuksaltirishga qaratilgan targʻibot-tashviqot ishlarini kengaytirish, takomillashtirish zarurati yuzaga kelishi tabiiy. Xuddi shu mazmunda joriy yilning 24-25 oktabr kunlari “Maʼnaviyat festivali” doirasidagi tadbirlar “Maʼrifat” targʻibotchilar jamiyati aʼzolari, respublikamizning eng nufuzli taʼlim-fan, madaniyat va sanʼat arboblari, elimiz nazariga tushgan shoir va yozuvchilardan tashkil etilgan maʼrifat vakillari Buxoro viloyati boʻylab tashrif buyurdilar. “Maʼnaviyat festivali”ning ochilish marosimi Yoshlar markazida oʻtkazilib, maʼrifat vakillari ishtirokida press-konferensiya tashkil etildi. Press-konferensiyada viloyatimizning koʻzga koʻringan maʼnaviyat targʻibotchilariga koʻkrak nishoni hamda guvohnoma taqdim etildi. Shular qatorida Buxoro davlat universiteti tuzilmasidagi Qatagʻon qurbonlar xotirasi muzeyi direktori A. Hamroyevga “Maʼnaviyat targʻibotchisi” koʻkrak nishoni taqdim etildi. Konferensiyada A. Hamroyev, M. Raxmonova muallifligi ostida nashr etilgan “7 pirning shuhrati sharif yurt shon-shavkati”nomli kitobining taqdimoti boʻlib oʻtdi.Xuddi shu kuni Buxoro davlat universitetining katta yigʻingohida festival ishtirokchilarining professor-oʻqituvchilar hamda talabalar bilan uchrashuvi boʻlib oʻtdi. Uchrashuvda BuxDU rektori O.X. Xamidov “Bunday salobatli, salohiyatli auditoriyada boʻlish nafaqat bizning balki har bir insonning orzusi ekanligini” taʼkidlab oʻtdi.25 oktabr kuni “Maʼnaviyat festivali” vakillari hamda Buxoro davlat universitetining bir qator professor-oʻqituvchilari maʼnaviyat targʻibotini amalda qoʻllab, A. Hamroyev boshchiligida Gʻijduvon tumanining 62-sonli IDUMda “Kitob mening taqdirimda” mavzusidagi maʼnaviy maʼrifiy tadbir oʻtkazildi.Shuningdek, 25 oktabr kuni Buxoro shahrining Yoshlar markazida “Maʼnaviyat festivali”ning gʻoliblarni taqdirlash tantanali marosimi oʻtkazildi. Marosimda viloyatimiz nomidan ishtirok etgan BuxMTI Ijtimoiy fanlar kafedrasi katta oʻqituvchisi M. Raxmonova gʻolib deb topilib, qimmatbaho sovgʻalar bilan taqdirlandi.Yoshlar bilan ishlash, maʼnaviyat va maʼrifat bo'limi uslubshunosi Sh. Radjabova
