Kecha 1-noyabr kuni Buxoro davlat universiteti rektori O.X. Xamidov 1-bosqich magistrlari bilan universitet 104-auditoriyasida uchrashuv o`tkazdi. Ushbu yig`ilishda O`quv ishlari bo`yicha prorektor M.I. Daminov, Ilmiy ishlar va innovatsiyalar bo`yicha prorektor O.S. Qahhorov, Magistratura bo`limi boshlig`i A.A. To`rayev ishtirok etishdi. Uchrashuv erkin muloqot tarzida olib borildi. Kun tartibiga qo‘yilgan masalalar yuzasidan universitet rektori ma’ruza qildi. Rektor o‘z ma’ruzasida magistratura talabalarining ichki tartib qoidalarga rioya qilishga, ular oldida turgan vazifalarni og‘ishmay bajarishga, dissertatsiya mavzusi doirasida ilmiy maqolalar yozib, olimlar e’tirof etgan Scopus, Science Direct hamda Web of science ilmiy platformalarida chop ettirish, ilmiy asosga ega maqolalar hamda tezislar orqali mamlakatimiz va viloyatimiz xalq xo‘jaligining turli tarmoqlarini rivojlantirishga bor bilim va iqtidorlaridan samarali foydalanishga da’vat etdi.Himoya ishlarining ilmiy natijadorligi yuqori baholanishi bilan birga universitet reytingini oshirishga xizmat qilishi ham ta’kidlab o‘tildi. Magistratura talabasi yuqori muomala madaniyati va mustahkam bilimi bilan boshqalardan ajralib turishi kerak. "Magistratura talabasi deganda universitet kelajagi va nufuzini oshirishga xizmat qiladigan shaxsni tushunaman. Kelgusida ana shu oliygohda kelib ilmiy ish qilaman degan iqtidorli talabalarga doimo bag‘rimiz ochiq" - deydi BuxDU rektori O.X. Xamidov.Bugun magistratura yo‘nalishida olib borilayotgan monitoringlar bizga talantli yoshlarni tanlab olish imkoniyatini bermoqda. Himoya ishlarini ishlab chiqarish korxonalari bilan bog‘lab amalga oshirish ham talaba, ham universitet moddiy-texnik imkoniyatlarini yaxshilashga xizmat qiladi. Magistraturada tahsil olayotgan talaba o‘z ish rejasiga ega bo‘lishi, ularni amalga oshirish uchun fidoyilik bilan izlanishi, hech bo‘lmasa xorijiy tillardan ikkitasini bilishi zarur. Biz sizlarni har jihatdan qo‘llab-quvvatlashga tayyormiz. Sizdan faqat bilim olishingiz, ilmiy salohiyatingizni boyitishingiz talab etiladi, xolos. Oshkora muloqotni talabalarning savollari yanada qiziqarli o‘tishini ta’minladi.
