Buxoro davlat universitetiga Koreya Respublikasi delegatsiyasi tashrif buyurdi. Delegatsiya Koreya Respublikasi hukumatining yuqori martabali a'zolari, xususan Tashqi ishlar vazirligi, Intellektual mulk agentligi, Milliy soliq xizmati, Iqtisodiyot va moliya vazirligi, Moliyaviy nazorat xizmati, Ichki ishlar vazirligi vakillaridan tashlil topgan.Delegatsiyani BuxDU xalqaro hamkorlik bo‘yicha prorektori A. Jo‘rayev kutib oldi. Uchrashuv davomida Buxoro davlat universiteti hamda mavjud xalqaro hamkorlik aloqalari xususida ma'lumot berildi. Delegatsiya rahbarining ma'lum qilishicha, Koreya Respublikasida barqaror iqtisodiy o‘sish sur'atlarini ta'minlash maqsadida hukumat tomonidan Shimoliy va Janubiy iqtisodiy hamkorlik siyosatlari ishlab chiqilgan. Shimoliy iqtisodiy hamkorlik siyosati Koreyaning Yevroosiyo mamlakatlari bilan manfaatli sheriklik aloqalarini rivojlantirish strategiyasini belgilaydi. O‘zbekiston Markaziy Osiyo mintaqasining tranzit yo‘laklari chorrahasida joylashgan. Shu bois, ushbu siyosatning muvaffaqiyatli ro‘yobga chiqarilishi O'zbekiston bilan barcha sohalardagi munosabatlar istiqboliga bevosita bog'liq. Ushbu tashabbus doirasida Koreya Respublikasi tomonidan ilgari surilayotgan loyiha va dasturlar savdo-iqtisodiy, sarmoyaviy sheriklikni ko‘zda tutadi. Prorektor A. Jo‘rayev tomonidan universitetda amalga oshirilishi mumkin bo‘lgan hamkorlik loyihalari haqida ma'lumot berildi. Shuningdek, mehmonlarda KOICA markazi faoliyati, KOICA ko‘ngillilari hamda Iqtisodiyot va turizm fakulteti o‘qituvchilari hamkorligida tayyorlangan Buxoro shahrining turistik xaritasi loyihasi ham qiziqish uyg‘otdi. Delegatsiya a'zolari BuxDU tarixi muzeyi bilan ham tanishishdi.
