Fakultet haqida

Buxoro davlat universiteti rektorining 2016-yil 31-dekabrdagi 531-U buyrug‘iga asosan Ijtimoiy-iqtisodiy fakultet (1996-yilda Iqtisodiyot fakulteti sifatida tashkil etilgan) Iqtisodiyot va turizm fakulteti sifatida tashkil etildi.

2014-yilgacha Iqtisodiyot fakultetini dekan sifatida fakultet asoschilaridan iqtisod fanlari doktori, professor B. N. Navro‘zzoda, keyinchalik fizika-matematika fanlari doktori, professor D. Q. Durdiev, iqtisod fanlari doktori H. O. Raxmonov, iqtisod fanlari nomzodi, dotsent M. A. Oripov, iqtisod fanlari nomzodi A. T. Jo‘rayevlar boshqarishgan.

Buxoro davlat universiteti rektorining 2014-yil 25-avgustdagi 256-U buyrug‘iga asosan Ijtimoiy-iqtisodiy fakultet (1996-yilda Iqtisodiyot fakulteti sifatida tashkil etilgan) va Tarix fakulteti (1930-yilda Buxoro davlat pedagogika instituti tarkibida tashkil etilgan) birlashtirilib, Ijtimoiy-iqtisodiy fakulteti sifatida qayta tashkil etildi.

Iqtisodiyot va turizm fakulteti sifatida tashkil etilgach, jamoaga iqtisod fanlari nomzodi, dotsent Abror Turobovich Jo‘rayev boshchilik qilgan.

Hozirgi kunda Iqtisodiyot va turizm fakulteti Buxoro davlat universitetidagi peshqadam jamoalardan biri sifatida faoliyat ko‘rsatmoqda va unga 2019-yil avgust oyidan iqtisod fanlari nomzodi, dotsent Dilshod Shoyimardonkulovich Yavmutov boshchilik qilmoqda.

Fakultet jamoasi faoliyatini O‘zbekiston Respublikasining “Ta’lim to‘g‘risida”gi qonuni, Respublikamiz Prezidentining “Oliy ta’lim tizimini yanada rivojlantirish chora-tadbirlari to‘g‘risida”gi qaroriga amal qilgan holda olib bormoqda.

Fakultet faoliyati oliy ta’lim, professional ta’lim, umumiy o‘rta va o‘rta maxsus ta’lim muassasalari hamda ijtimoiy sohalar uchun zarur bo‘lgan yuqori malakali mutaxassislar tayyorlashga qaratilgan.

Hozirgi kunda fakultetda 5 ta kafedra faoliyat olib boradi. Xususan, “Iqtisodiyot” kafedrasi, “Marketing va menejment” kafedrasi, “Turizm va mehmonxona xo‘jaligi” kafedrasi, “Agrobiznes va logistika” kafedrasi hamda “Buxgalteriya hisobi va statistika” kafedrasi. Ushbu kafedralardagi 13 ta ta’lim yo‘nalishi va 6 ta mutaxassislikda ta’lim olishning kunduzgi, sirtqi va kechki shakllaridan foydalaniladi. Fakultetda asosiy shtatda jami 69 nafar professor-o‘qituvchi faoliyat ko‘rsatadi. Faoliyat ko‘rsatayotgan professor-o‘qituvchilarning 17 nafari (24,6 foiz) ilmiy darajaga ega, 52 nafari (75,4 foiz) esa ilmiy darajaga ega bo‘lmagan xodimlardir.

Xususan, O‘zbekiston Respublikasi Oliy ta’lim tizimini 2030-yilgacha rivojlantirish konsepsiyasida nazarda tutilgan iqtisodiyot tarmoqlari ehtiyojlaridan kelib chiqqan holda, fan, ta’lim va ishlab chiqarishning mustahkam integratsiyasini ta’minlash asosida ta’lim sifatini yaxshilash, raqobatbardosh kadrlar tayyorlash, ilmiy va innovatsion faoliyatni samarali tashkil etish, xalqaro hamkorlikni rivojlantirish borasida o‘rta va uzoq muddatli istiqboldagi bosqichlar belgilangan bo‘lib, sohaga oid dasturlar va kompleks chora-tadbirlar ishlab chiqilgan.

Ayniqsa, fakultet dekani D. Sh. Yavmutov Yevropa Ittifoqining TEMPUS, ERASMUS+ va PASCH dasturlari doirasida O‘zbekistonda ta’lim jarayonlarini zamonaviylashtirish bo‘yicha grantlar ishtirokchisi hisoblanadi. Hozirda u Yevropa Ittifoqining Erasmus+ dasturi BioEcUz loyihasi — “O‘zbekistonda bioiqtisodiyotni barqaror rivojlantirish” dasturi ishtirokchisidir.

Davlat ilmiy-texnika dasturlari doirasida Buxoro davlat universitetida amalga oshirilayotgan OT-A-QX-2018-22 “Chorvachilikning ozuqa bazasini rivojlantirish orqali chorvachilik mahsulotlari yetishtirishning iqtisodiy samaradorligini oshirish (Buxoro viloyati misolida)” mavzusidagi 2018–2020-yillarga mo‘ljallangan amaliy tadqiqot loyihasida ishtirok etgan.

U shuningdek, 2018-yilda o‘tkazilgan III-Xalqaro ijtimoiy fanlar kongressi INCSOS-2018 hamda 2020 va 2021-yillarda o‘tkazilgan xalqaro ilmiy kongresslar — SOCIETY OF AMBIENT INTELLIGENCE 2020 va 2021 (III-ISC-2020, IV-ISC-2021) xalqaro kongresslari koordinatori sifatida anjumanlarning yuqori saviyada o‘tishiga o‘z hissasini qo‘shdi.

Chet mamlakatlar OTMlari va ilmiy-tadqiqot institutlari bilan aloqalar

Fakultetda xalqaro aloqalar namunali tarzda yo‘lga qo‘yilgan. Santyago de Kompostela universiteti, Valensiya politexnika universiteti (Ispaniya), Bryussel erkin universiteti (Belgiya), Rovaniemi universiteti (Finlandiya), Saloniki texnologik ta’lim universiteti (Gretsiya) kabi ko‘plab yetakchi oliy ta’lim muassasalari bilan ilmiy tadqiqotlar borasida va o‘qituvchilarning malakasini oshirish yo‘nalishida hamkorlik o‘rnatilgan.

Yevropa Komissiyasining TEMPUS hamda ERASMUS MUNDUS dasturlari doirasida ushbu universitetlarda 2011–2021-yillar mobaynida 38 ga yaqin talaba o‘qib qaytdi, 17 dan ortiq tadqiqotchi hamda 12 nafar professor-o‘qituvchi ilmiy izlanishlar olib bordi.

Iqtidorli talabalardan 6 nafari BMTning O‘zbekistondagi vakolatxonasi tomonidan tashkil qilingan tanlovlarda muntazam ravishda ishtirok etib, g‘oliblar safidan o‘rin olib kelishmoqda. Toshkent davlat iqtisodiyot universiteti hamda Samarqand iqtisodiyot va servis institutlari bilan mutaxassislarni qayta tayyorlash va malakasini oshirish borasida doimiy hamkorlik qilib kelinmoqda.

Ziyodulla Nurov Italiyaning yetakchi iqtisodchi olimlaridan tashkil topgan ixtisoslashgan kengashda o‘z dissertatsiyasini muvaffaqiyatli himoya qildi va iqtisodiyot bo‘yicha PhD ilmiy darajasiga loyiq deb topildi. Ziyodulla Nurov Erasmus+ akademik mobillik dasturi doirasida Italiyaning Akvila universitetiga (Times reytingida 501–600 guruhida) ilmiy safarga yuborilib, uning ilmiy izlanishlari italiyalik olimlarda qiziqish uyg‘otganligi sababli, uning PhD dissertatsiyasi uchun qo‘sh rahbarlikni amalga oshirish taklif qilingan edi.

Imzolangan kelishuv asosida dissertatsiyaga Akvila universitetidan professor Luidji Bidjiero, Buxoro davlat universitetidan Abror Jo‘rayev ilmiy rahbar sifatida tayinlandi. Buxoro davlat universiteti ilmiy kengashida universitet rektori O. Xamidov Ziyodulla Nurovga PhD diplomini topshirdi va kelgusi ilmiy ishlarida muvaffaqiyat tiladi.

Yevropa va Osiyo davlatlarining 10 dan ortiq nufuzli universitetlari va ilmiy-tadqiqot institutlari bilan hamkorlik shartnomasiga asosan aloqalar o‘rnatilgan. Yevropa mamlakatlari oliy o‘quv yurtlarida tajriba o‘tab kelinmoqda. Jumladan, Madrid masofaviy o‘qitish universiteti, Polshaning Adam Mitskevich universiteti va Ispaniyaning Santyago de Kompostela universitetida.

Fakultetda quyidagi ta’lim yo‘nalishlari bo‘yicha bakalavrlar tayyorlanadi:

— 60310100 – Iqtisodiyot (tarmoqlar va sohalar bo‘yicha);

— 60310500 – Raqamli iqtisodiyot (tarmoqlar va sohalar bo‘yicha);

— 60411300 – Biznesni boshqarish (tarmoqlar va sohalar bo‘yicha);

— 60411700 – Logistika (yo‘nalishlar bo‘yicha);

— 60412400 – Agrobiznes va investitsion faoliyat;

— 60410100 – Buxgalteriya hisobi va audit (tarmoqlar va sohalar bo‘yicha);

— 60410800 – Statistika (tarmoqlar va sohalar bo‘yicha);

— 60410500 – Bank ishi va auditi (tarmoqlar va sohalar bo‘yicha);

— 60412500 – Marketing (tarmoqlar va sohalar bo‘yicha);

— 60411200 – Menejment (tarmoqlar va sohalar bo‘yicha);

— 60411400 – Inson resurslarini boshqarish;

— 61010400 (2020-yilgacha 5610300) – Turizm (faoliyat yo‘nalishlari bo‘yicha);

— 61010100 (2020-yilgacha 5610200) – Mehmonxona xo‘jaligini tashkil etish va boshqarish.

Fakultet manzili

Buxoro shahar, M. Iqbol ko‘chasi, 11-uy, 2-blok, 3-qavat.