30.08.2026

Aziz yurtdoshlar, qadrli ustozlar, talabalar va yoshlar!

Sizlarni xalqimiz hayotidagi eng ulug‘ va qadrli sana - O‘zbekiston Respublikasi davlat mustaqilligining 35 yilligi bilan chin qalbimdan samimiy muborakbod etaman!

Mustaqillik - xalqimizning asriy orzu-intilishlarini ro‘yobga chiqargan, milliy davlatchiligimizni tiklagan, o‘z taqdirimiz va kelajagimizni o‘z qo‘limiz bilan bunyod etish imkonini bergan buyuk tarixiy ne’matdir. O‘tgan o‘ttiz besh yil davomida yurtimiz ulkan taraqqiyot yo‘lini bosib o‘tdi, jamiyatimiz hayotida yangicha dunyoqarash, bunyodkorlik va kelajakka ishonch ruhi qaror topdi.

Bugun O‘zbekiston taraqqiyotining yangi bosqichida ta’lim, ilm-fan, innovatsiya va zamonaviy texnologiyalar mamlakatimiz rivojining muhim tayanchiga aylanmoqda. Ayniqsa, bilimli, tashabbuskor, mustaqil fikrlaydigan, zamonaviy kasb va texnologiyalarni puxta egallagan yosh avlodni voyaga yetkazish davlatimiz siyosatining ustuvor yo‘nalishlaridan biri bo‘lib qolmoqda. Zero, ertangi kunimizning qanday bo‘lishi, avvalo, bugun yoshlarimizga berayotgan bilimimiz, tarbiyamiz va imkoniyatlarimizga bog‘liq.

Buxoro davlat universiteti jamoasi ham ana shu ulug‘ maqsadlarga hamohang ravishda ta’lim sifatini yuksaltirish, ilmiy tadqiqotlarni rivojlantirish, xalqaro hamkorlikni kengaytirish, zamonaviy bilim va innovatsiyalarni amaliyotga tatbiq etish yo‘lida izchil mehnat qilmoqda. Biz uchun har bir talabamizning muvaffaqiyati, har bir ustozimizning ilmiy yutug‘i, har bir yangi g‘oya va tashabbus — Yangi O‘zbekiston taraqqiyotiga qo‘shilgan munosib hissadir.

Muqaddas Buxoro zamini asrlar davomida ilm-ma’rifat, tafakkur va yuksak ma’naviyat markazlaridan biri bo‘lib kelgan. Bizning eng katta vazifamiz — buyuk ajdodlarimiz yaratgan ilmiy va ma’naviy merosga munosib bo‘lish, uni zamonaviy bilim va yangicha tafakkur bilan boyitib, kelgusi avlodlarga yetkazishdir.

Bugungi murakkab va tez o‘zgarayotgan dunyo bizdan yanada katta bilim, mas’uliyat, birdamlik va fidoyilikni talab etmoqda. Ishonchim komilki, xalqimizning bunyodkorlik salohiyati, yoshlarimizning shijoati, ustozlarimizning fidokorona mehnati va Vatanga sadoqati tufayli O‘zbekiston bundan-da yuksak marralarni zabt etadi.

“Yagona Vatan, yagona xalq bo‘lib, yangi hayot va kelajak yaratamiz!” degan ezgu g‘oya har birimizni bir maqsad, bir orzu va bir buyuk kelajak sari birlashtirsin!

Aziz yurtdoshlar!

Barchangizni O‘zbekiston Respublikasi davlat mustaqilligining 35 yilligi bilan yana bir bor samimiy tabriklayman. Xonadonlaringizdan tinchlik va fayzu baraka, qalblaringizdan Vatanga muhabbat va kelajakka ishonch hech qachon arimasin.

Jonajon O‘zbekistonimiz tinch, xalqimiz hamisha omon, istiqlolimiz abadiy bo‘lsin!

Mustaqilligimizning 35 yilligi muborak bo‘lsin!

Obidjon Xamidov
Buxoro davlat universiteti rektori,
iqtisodiyot fanlari doktori, professor