10.04.2026

O‘zbekiston Respublikasi Vazirlar Mahkamasining 2025-yil 23-fevraldagi 75-sonli “Tadbirkorlik subyektlari hamda ilmiy hamjamiyat o‘rtasida o‘zaro hamkorlik aloqalarini rivojlantirish chora-tadbirlari to‘g‘risida”gi qarori mamlakatimizda innovatsion iqtisodiyotni qurish yo‘lidagi muhim qadamlardan biri bo‘ldi.

Mazkur qarorning asosiy maqsadi — ilmiy tadqiqotlar natijalarini amaliyotga joriy etish, tadbirkorlik subyektlarining muammolarini ilmiy yechimlar orqali hal qilish hamda olimlar va biznes vakillari o‘rtasida mustahkam ko‘prik o‘rnatishdan iborat.

Buxoro davlat universiteti viloyatdagi yirik ilmiy markaz sifatida mazkur qaror ijrosini ta’minlashda faol ishtirok etmoqda. Hozirda universitet olimlari va tadbirkorlar hamkorligini yangi bosqichga olib chiqish uchun quyidagi ustuvor vazifalar belgilangan:
Ilmiy ishlanmalarni tijoratlashtirish: Universitet laboratoriyalarida yaratilgan innovatsion loyihalarni mahalliy ishlab chiqarish korxonalariga tatbiq etish.
Buyurtma asosidagi tadqiqotlar: Tadbirkorlik subyektlari duch kelayotgan texnik, iqtisodiy yoki texnologik muammolarni universitet professor-o‘qituvchilari va yosh tadqiqotchilari tomonidan ilmiy asosda yechib berish.
Investitsiyaviy jozibadorlik: Ilm-fan yutuqlarini biznes uchun foydali aktivga aylantirish orqali hududiy iqtisodiyotning o‘sishiga hissa qo‘shish.

Buxoro davlat universiteti Savdo-sanoat palatasi, Soliq boshqarmasi va boshqa hamkor tashkilotlar bilan birgalikda doimiy muloqot maydonlarini tashkil etmoqda. Siz o‘zingizning biznes loyihangiz uchun ilmiy ko‘mak olmoqchi bo‘lsangiz yoki ilmiy yangiligingizni ishlab chiqarishga joriy etish istagida bo‘lsangiz, universitetimizning Innovatsion ishlanmalarni tijoratlashtirish bo‘limiga murojaat qilishingiz mumkin.