Sevinch bag`ishlaysan keksa-yu yoshga
Navro`zjon, bu yilgi kelishing boshqa...
Qorli-qirovli, sovuq kunlar ortda qolib, qalbimizga shodlik solib Navro`z ayyomi kirib keldi. Har galgidek Buxoro davlat universitetida maksimal kayfiyat hukmron bo`ldi.
Bir yonda doshqozondagi sumalak esonlik, omonlik deya kosalarga quyilsa, bir yonda dorboz-u polvonlarning mahoratlari barchaga bahoriy shijoat bag`ishladi..
BuxDUning mardlari esa polvonlarga boqib, biz ham qolishmaymiz, deya qadim milliy o`yinlarimiz barobarida zamonaviy sport musobaqalarida ham o`zlarini sinab ko`rishdi.
Buxoro viloyati hokimining yoshlar siyosati, ijtimoiy rivojlantirish va ma’naviy-ma'rifiy ishlar bo‘yicha o‘rinbosari Mirali Hamroyev hamda BuxDU rektori Obidjon Xamidov Navro`z sayli doirasida sport musobaqalarida g`olib bo`lgan talabalarni medal, diplom hamda esdalik sovg`alari bilan taqdirladilar.
Chor-atrofdagi O`zbekistonimizning turli go`shalariga monand tayyorlangan, urf-odat va an'analarimizni aks etgan dekoratsiyali ayvonlar, milliy liboslarimiz, hunarmandchiligimizni namoyon etadigan ko`rgazmalar dillarni yayratdi.
Navro`z sayli davomida BuxDU rektori Obidjon Xamidov barchani bayram bilan samimiy qutladilar:
"Navro`z – tinchlik, birdamlik, mehr-muhabbat, qadr ayyomidir. Umid bayramidir. Dehqonbobo yerga urug` qadab, natijasini ezgu umid bilan intiqib kutganidek, har birimizga xayrli niyat bilan “qadagan urug`larimiz”ning natijasini ko`rish nasib etsin. O`zbekistonimizning ko`p millatli xalqi uchun joriy yil barakali, serunum, manfaatli bo`lishiga tilakdoshman. Kirib kelayotgan bahoriy tengkunlik – Navro`zi olam bilan barchangizni chin qalbimdan tabriklayman. Har kunimiz Navro`z bo`lsin!"
Bir-biridan go`zal, dilbar qizlarimiz o`z qo`llari bilan tayyorlagan turli-tuman betakror Navro`z taomlari, shirinliklari ko`zlarni quvnatib, ishtahani oshirdi.
Sayl mobaynida yozilgan bayram dasturxoni barcha uchun diydorlashuv, shukrona, quvonch onlarini tuhfa etdi.
Bu go`zal yurtda, bu betakror OTMda Navro`z bayrami munosabati bilan tadbirlar davom etadi.
