2022-yil 7-sentabrda Buxoro viloyati hokimligining yig‘ilishida “Davlat tili va unga oid qonunchilik hujjatlari bilimdoni” viloyat tanlovini o‘tkazish bo‘yicha qaror qabul qilingan, o‘zbek tilining siyosiy-huquqiy, ijtimoiy-iqtisodiy, ma’naviy-ma’rifiy jabhalarda to‘laqonli joriy etilishini hamda faol qo‘llanishini ta’minlashga, shuningdek, namunali ishlarni rag‘batlantirishga qaratilgan ushbu tanlov “Eng yaxshi bilimdon tuman (shahar) hokimi maslahatchisi”, “Eng yaxshi bilimdon tuman (shahar) ma’naviyatchisi, “Eng yaxshi bilimdon ta’lim muassasasi ma’naviyatchisi” yo‘nalishlari bo‘yicha tashkil etilishi va o‘tkazilishi tartibi belgilangan edi.
Tanlovda davlat tiliga oid me’yoriy hujjatlar mohiyatini atroflicha biladigan va hujjatlarda belgilangan vazifalar bo‘yicha qator ishlarni amalga oshirgan, milliy tildagi badiiy ijod namunalarini chuqur o‘zlashtirgan, yozma va og‘zaki nutq savodxonligini puxta egallagan mahalliy ijro etuvchi hokimiyat (tumanlar va shaharlar) idoralari rahbarlari hamda ta’lim muassasalari ma’naviyatchilari qatnashishi nazarda tutilgan edi. Alisher Navoiy nomidagi Toshkent davlat o‘zbek tili va adabiyoti universiteti huzuridagi Davlat tilida ish yuritish asoslarini o‘qitish va malaka oshirish markazi Buxoro viloyati hududiy bo’linmasi tanlovning ijrochi tashkilotchisi hisoblanishi ham bayonnomada qayd qilingan edi.
Tanlov 14-oktabrda Markazda tashkil qilindi va tanlov ishtirokchlari 3 bosqichda bellashdilar:
birinchi bosqich Davlat tilida ish yuritish asoslarini o‘qitish va malaka oshirish markazi Buxoro viloyati hududiy bo‘linmasida yozma tarzda o‘tkazilib, bunda ishtirokchilardan diktant olindi, ularning imlo savodxonligi o‘rganildi, davlat tilining millat taraqqiyotida tutgan o‘rni bo‘yicha 5 daqiqalik chiqishi asosida notiqlik darajalari baholandi.
Ikkinchi bosqichda “O‘tgan kunlar” asari doirasida yopiq test, uchinchi bosqichda davlat tiliga oid me’yoriy hujjatlar mazmun-mohiyati bo‘yicha ochiq test sinovlari o‘tkazildi.
Tanlov g‘oliblarini taqdirlash, tashkiliy chora-tadbirlarni moliyalashtirish bilan bog‘liq barcha masalalar Alisher Navoiy nomidagi Toshkent davlat o‘zbek tili va adabiyoti universiteti huzuridagi Davlat tilida ish yuritish asoslarini o‘qitish va malaka oshirish markazi hisobidan amalga oshirilishi: 1-o‘rinni egallagan g‘olib ishtirokchiga televizor, 2-o‘rin sohibiga noutbook, 3-o‘rin egasiga planshet; qolgan barcha ishtirokchilarga esa “O‘zbek tilini ribojlantirish jamg‘armasi” tomonidan kitoblar jamlanmasi taqdim etilishi rejalashtirilgan edi.
Joriy yilning 22-noyabrida tanlov g‘oliblarini taqdirlash tadbiri bo‘lib o‘tdi.
Taqdirlash marosimiga Ma’naviyat va davlat tilini rivojlantirish masalalari departamenti mudiri S.Shukurov, Davlat tilida ish yuritish asoslarini o‘qitish va malaka oshirish markazi direktori I.Azimov, Buxoro Davlat universiteti rektori O.Hafizov, shuningdek, poytaxtdan tashrif buyurgan bir qator mehmonlar ishtirok etishdi.
O‘zbekiston Respublikasi Vazirlar Mahkamasining “Qadring baland bo‘lsin, ona tilim!” respublika tanlovi doirasida Davlat tilida ish yuritish asoslarini o‘qitish va malaka oshirish markazi Buxoro viloyati hududiy bo‘linmasida o‘tkazilgan “Davlat tili va unga oid qonunchilik hujjatlari bilimdoni” viloyat tanlovida Buxoro tuman hokimligining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Ergasheva Zuhra Zulqandovna 1-o‘rinni, respublika Ma’naviyat va ma’rifat markazi Vobkent tuman bo‘linmasi rahbari Rustamov Nodir O‘ktamovich 2-o‘rinni, Peshku tuman hokimligining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Haydarova Gulruh Rustamovna 3-o‘rinni egallab, e’lon qilingan sovrinlarga ega bo‘lishdi.
O‘zbekiston Respublikasi Prezidenti Shavkat Mirziyoyev ta’kidlaganidek: “Ona tilimiz – milliy maʼnaviyatimizning bitmas-tuganmas bulogʻidir. Shunday ekan, unga munosib hurmat va ehtirom koʻrsatish barchamizning nafaqat vazifamiz, balki muqaddas insoniy burchimizdir”. Ana shu burchni chuqur anglagan holda ushbi tanlovni tashkil etishga ijobiy munosabat bildirib, tanlov g‘oliblarini taqdirlash, tashkiliy chora-tadbirlarni moliyalashtirish bilan bog‘liq barcha masalalarni o‘z zimmasiga olgan Ma’naviyat va davlat tilini rivojlantirish masalalari departamenti mudiri S.Shukurovga, Alisher Navoiy nomidagi Toshkent davlat o‘zbek tili va adabiyoti universiteti huzuridagi Davlat tilida ish yuritish asoslarini o‘qitish va malaka oshirish markazi rahbari I.Azimovga, “O‘zbek tilini ribojlantirish jamg‘armasi” rahbari A.Eminovga; tanlovni tashkil etish va o‘tkazishga yaqindan yordam bergan Buxoro viloyati hokimi B.Zaripovga, Buxoro viloyati hokimining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi A.Rustamovga Buxoro viloyati hududiy bo‘linmasi o‘zining samimy minnatdorchiligini bildiradi.
