18-noyabr kuni universitetga YUNESKO ishlari bo‘yicha Germaniya komissiyasi rahbari Roman Luksheyter tashrif buyurdi. Mehmonni xalqaro hamkorlik bo‘yicha prorektor A.Jo‘rayev qabul qildi. Uchrashuvda “Tasviriy sanʼat va muhandislik grafikasi” kafedrasi dotsenti S.Abdullayev hamda Markaziy Osiyo xalqaro tadqiqotlar instituti Strategik rivojlantirish bo‘yicha direktori S.Boboyev ham ishtirok etishdi.
R.Luksheyter Toshkent shahrida bo‘lib o‘tgan “Erta yoshdagi bolalarga g‘amxo‘rlik va taʼlim bo‘yicha Butunjahon konferensiyasi”da ishtirok etish uchun malakatimizga kelgan bo‘lib, o‘zining tashrifi davomida aynan Buxoro davlat universitetiga ham kelishni rejalashtirganini maʼlum qildi. Chunki, universitetimiz Germaniyaning Potsdam amaliy fanlar universiteti bilan madaniy meros obyektlarini restavratsiya qilish yo‘nalishida loyihani amalga oshirmoqda bo‘lib, yaqinda 40 nafardan ortiq germaniyalik va o‘zbekistonlik talaba hamda professor-o‘qituvchilar ishtirokidagi yozgi maktab muvaffaqiyatli o‘tkazildi. R.Luksheyter ushbu yozgi maktab to‘g‘risida maʼlumoti mavjudligini aytib o‘tib, aynan shu yo‘nalishdagi hamkorlik bo‘yicha fikr almashish maqsadida kelganligini aytib o‘tdi. Mehmonga Buxoro davlat universiteti faoliyati, madaniy meros obyektlarini muhofaza va restavratsiya qilish bo‘yicha amalga oshirilgan ilmiy va amaliy ishlar to‘g‘risida maʼlumot berildi.
