Hurmatli qadrdonlar, bugungi shukrona va tinchlik ayyomi – “Xotira va qadrlash kuni” qutlug` bo`lsin!
Biz o`zimizni haqli ravishda omadli avlod, deya olamiz. Tahlikali bir davrda, obod zaminda tinch va farovon yashayapmiz. Bu mustaqillik va osoyishtalik ne’mati o`z-o`zidan kelmagan. Unda jasur ajdodlarning mashaqqati, mehnati, uqubati mujassam. Mudhish urushlarda qon kechgan bobolarimizning hissasi beqiyos. Bugungi sana ana shu o`tgan ajdodlarimizni xotirlash, yod etish, qadrlash va ular holidan boxabar bo`lish, hurmat va ehtirom ko`rsatish yo`lidagi qutlug` kun.
Bugun xotira maydonidagi “Xotira” kitobi o`tgan tarix haqida so`zlar ekan, bugungi kunga qadar Ikkinchi jahon urushi va front orti faxriylarini e’zozlash, ularni moddiy va ma’naviy qo’llab-quvvatlash borasida e’tiborga molik ishlar qilindi va bu har yili muntazam amalga oshirilayotganini alohida e’tirof etish joiz.
Inson xotirasi ulug`, qadri muqaddas. Ushbu purma’no jumla ortida insoniylik, o`lmas qadriyatlar mujassam. O`tgan va bo`lib o`tayotgan voqea-hodisalardan ibrat olib, farovon hayotimizga shukrona keltirib, tinchlikka o`z hissamizni qo`shishga nima yetsin?!
Barchangizni bugungi ayyom bilan chin qalbimdan tabriklayman. Xonadoningizga qut-baraka, tinchlik va omonlik tilayman. Xalqimizning birdamligiga ko`z tegmasin! O’tganlarning oxirati obod bo’lsin!
Hurmat bilan Buxoro davlat universiteti rektori, iqtisodiyot fanlari doktori, professor Obidjon Xamidov
