11.01.2022

Inson yaralibdiki, uning bosib o‘tgan har bir tarixiy izlari ma’lum yutuqlar bilan xarakterlanadi, jumladan, XXI asr nafaqat texnika va texnologiyalar asri, balki, tilga bo‘lgan e’tiborning yuksak darajaga ko‘tarilgan davri desak, mubolag‘a bo‘lmas. Til — inson ma’naviy olamida uning o‘zligini anglash yo‘lidagi eng buyuk kashfiyotidir. Zero davrlar mobaynida tilni tadqiq qilar ekan inson, uning yangi va yangi qirralarini kashf qilib boradi. Shu jihatdan, til milliy madaniyatning eng muhim tarkibiy qismi hisoblanadi.Jahon tilshunosligida har bir milliy tilning o‘ziga xos xususiyatlarini ilmiy asosda o‘rganish hamda ularni kelajak avlodga yetkazish ilm-fan jadal rivojlanayotgan bugungi kunda muhim ahamiyat kasb etadi. Zero, biror xalq o‘z tilidagi so‘z boyligini chuqur o‘rganmay turib, o‘zligini ifodalovchi boy ma’naviy merosi hamda tarixini mukammal bila olmaydi. Biz g‘urur va iftixor tuyadigan milliyligimiz ko‘zgusi —O‘zbek tili ham, o‘zining ming yillik chuqur ildizlariga borib taqalsa-da, shu o‘rinda uning dunyo peshtoqida yangidan bunyodga kelishi va so‘z boyligini namoyon etishida o‘zining mislsiz hissasini qo‘shgan hazrat Mir Alisher Navoiyni yod etish joiz. Zero, bugungi kunda yurtimizda “Navoiydan” so‘zlamagan, shoirning biror g‘azali, yo ruboiysi yo‘qki, kuyga solinib, xalq ko‘nglidan joy olmagan, biror xonadon yo‘qki, “Xamsa”ni mutolaa qilmagan bo‘lsa. Ta’kidlash o‘rinliki, Alisher Navoiyning butun umri davomida yaratgan nodir asarlari kishini komillik, vatanparvarlik va insonparvarlik kabi ezgu fazilatlarga undagani bois, butun dunyoda o‘zbek tili va millatiga chuqur hurmat bilan qaraladi.Bugungi kunda islohotlar samarasi o‘laroq ona tilimiz nufuzi yanada mustahkamlanib, dunyoga yuz tutib bormoqda. Bu borada O‘zbekiston Respublikasi Prezidentining 2019 yil 4 oktyabrdagi “Davlat tili haqida”gi (1989 yil 21 oktyabr) qonunning 30 yilligini munosib nishonlash to‘g‘risida”gi hamda 2019 yil 21 oktyabrdagi “O‘zbek tilining davlat tili sifatidagi nufuzi va mavqeini tubdan oshirish chora-tadbirlari to‘g‘risida” gi farmonida ona tilimizning mamlakatimiz va xalqaro miqyosdagi obro‘si va ahamiyatini tubdan oshirish masalasiga qaratilgani, shuningdek, kuni kecha yurtboshimiz tomonidan “Mamlakatimizda o‘zbek tilini yanada rivojlantirish va til siyosatini takomillashtirish chora-tadbirlari to‘g‘risida”gi Farmoni, hamda joriy yilning 10 aprel sanasida imzolangan “O‘zbek tili bayrami kunini belgilash to‘g‘risida”gi qonuni va unga ko‘ra 21 oktyabrning “O‘zbek tili bayrami kuni” etib belgilanganligi ayniqsa, ahamiyatlidir. Eng quvonchlisi esa, 2020 yilning 23 sentyabr sanasida yurtboshimiz Shavkat Mirziyoyevning BMT Bosh assambleyasining 75-sessiyasida ona tilimiz — o‘zbek tilida nutq so‘zlagani dunyoning qay burchagida bo‘lmasin, istiqomad qilayotgan va o‘zbek tilida so‘zlashadigan butun xalqimiz, millatimiz uchun unutilmas va quvonchli voqea bo‘ldi. Butun dunyo xalqlarining global muammolarini ko‘tarib chiqqan tilimizni dunyo hamjamiyati olqishladi va qo‘llab-quvvatladi. Bu esa o‘zbek tilining xalqaro maydonda yana bir bor tan olinishi va o‘z o‘rnini tobora mustahkamlab borayotganligidan dalolatdir. Ana shunday islohotlarga javoban, biz yoshlar tilimizning bardavomiyligini ta’minlash va kelgusi avlodlarga uni yanada rivojlantirib yetkazish uchun mas’ulmiz va buni doim yodda tutamiz. G.S.Hojiyeva BuxDu Nemis va fransuz tillari kafedrasi o‘qituvchisi